വൈദ്യുതിമുടക്കം: ഓൺലൈൻ പഠനം ഇരുട്ടിൽ

വാഗമൺ: തുടർച്ചയായുണ്ടാകുന്ന വൈദ്യുതി മുടക്കം വിദ്യാർഥികളുടെ ഓൺലൈൻ പഠനത്തെ ബാധിക്കുന്നു. കാറ്റൊന്ന്​ വീ​ശിയാൽ വാഗമണ്ണിൽ വൈദ്യുതി നിലക്കുന്ന സ്ഥിതിയാണ്​. വട്ടപ്പതാൽ, നാരകക്കുഴി, പുള്ളിക്കാനം, കോലാഹലമേട്, വാഗമൺ, ഉണ്ണിച്ചെടിക്കാട്, കോട്ടമല, ചോറ്റുപാറ തുടങ്ങിയ സ്ഥലങ്ങളിലാണ് തുടർച്ചയായി വൈദ്യുതി മുടങ്ങുന്നത്. ലൈൻ കമ്പികൾക്ക് മുകളിലെ മരച്ചില്ലകൾ വെട്ടിമാറ്റാത്തതാണ് വൈദ്യുതി മുടങ്ങാൻ കാരണം. പ​ലപ്പോഴും മുടങ്ങുന്ന വൈദ്യുതി എത്തുന്നതും വളരെ വൈകിയാണ്​. തോട്ടങ്ങളിലൂടെയും കാടുകളിൽകൂടിയുമാണ് ലൈനുകൾ കടന്നുപോകുന്നത്. മരച്ചില്ലകൾ വീണ് ലൈൻ പൊട്ടിവീണാലും കണ്ടുപിടിക്കാൻ വൈകുന്നു. കാലവർഷം ആരംഭിക്കുന്നതിനുമുമ്പ് ലൈനുകൾക്ക് മുകളിലെ മരച്ചില്ലകൾ മുറിച്ചുമാറ്റണമെന്നാണ് കെ.എസ്.ഇ.ബിയുടെ ഉത്തരവെങ്കിലും പലയിടത്തും നടപ്പായിട്ടില്ല.