വെറുപ്പ് കലർന്ന ബഹിഷ്കരണാഹ്വാനങ്ങളെ തള്ളുക -നഹാസ് മാള

പെരുമ്പാവൂർ: വർധിച്ചുവരുന്ന വെറുപ്പിലും വിദ്വേഷത്തിലും അധിഷ്ഠിതമായ കാമ്പയിനുകൾക്ക് തടയിടേണ്ട ബാധ്യത സംസ്ഥാന സർക്കാറിനുണ്ടെന്നും ഒന്നിന് പിറകെ ഒന്നായി സംഘ്പരിവാറും ക്രിസ്ത്യൻ തീവ്രഗ്രൂപ്പുകളും പടച്ചുവിടുന്ന മുസ്​ലിംഭീതി പരത്തുന്ന വ്യാജ പ്രചാരണങ്ങൾ കേരളത്തിലെ സൗഹാർദാന്തരീക്ഷമാണ്​ തകർക്കുന്നതെന്നും സോളിഡാരിറ്റി സംസ്ഥാന പ്രസിഡന്‍റ്​ നഹാസ് മാള. ഹലാൽ മുദ്രയുള്ള ഉൽപന്നങ്ങളും മുസ്​ലിം കടകളും ബിസിനസ് സ്ഥാപനങ്ങളും ബഹിഷ്കരിക്കണമെന്ന പ്രചാരണം ഇപ്പോൾ ഭിന്നിപ്പിന്‍റെ ശക്തികൾ നടത്തുന്നുണ്ട്. ഇവയെ തിരിച്ചറിഞ്ഞ് ബഹിഷ്കരണാഹ്വാനങ്ങൾ സമൂഹം തള്ളിക്കളയണമെന്ന് അദ്ദേഹം ആവശ്യപ്പെട്ടു. മേയ്​ അഞ്ചിന്​ കാസർകോട്​ നിന്നാരംഭിച്ച 'ഇസ്​ലാമോഫോബിയ കുറ്റകൃത്യമായി പ്രഖ്യാപിക്കുക' പ്രമേയത്തിലെ യൂത്ത് കാരവന് പെരുമ്പാവൂരിൽ നൽകിയ സ്വീകരണ പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം. സംസ്ഥാന സെക്രട്ടറി ഡോ. അലിഫ് ഷുക്കൂർ സമ്മേളനം ഉദ്ഘാടനം ചെയ്തു. ജില്ല പ്രസിഡന്റ് പി.എൻ. നിയാസ് അധ്യക്ഷത വഹിച്ചു. മുസ്​ലിം യൂത്ത് ലീഗ് ദേശീയ നിർവാഹക സമിതി അംഗം ഷിബു മീരാൻ, എസ്.ഐ.ഒ മുൻ സംസ്ഥാന ജനറൽ സെക്രട്ടറി തൗഫീഖ് മമ്പാട്, ജമാഅത്തെ ഇസ്​ലാമി ജില്ല പ്രസിഡന്‍റ്​ അബൂബക്കർ ഫാറൂഖി, കൊച്ചി സിറ്റി പ്രസിഡന്‍റ്​ എം.പി. ഫൈസൽ അസ്ഹരി, എസ്.ഐ.ഒ ജില്ല പ്രസിഡന്‍റ്​ റിസ്വാൻ പെരിങ്ങാല തുടങ്ങിയവർ സംസാരിച്ചു. കൊച്ചി സിറ്റി പ്രസിഡന്റ് മുഈസ് നദ്‌വി സ്വാഗതവും പെരുമ്പാവൂർ ഏരിയ പ്രസിഡന്റ് ഫാസിൽ റഹ്മാൻ നന്ദിയും പറഞ്ഞു. അഭിവാദ്യപ്രകടനത്തിന് ജില്ല നേതാക്കളായ അലി അക്ബർ, അജ്ഫാസ്, അബ്ദുൽ ബാസിത് എന്നിവർ നേതൃത്വം നൽകി. photo