ഇടുക്കി സുവർണജൂബിലി സപ്ലിമെന്‍റിലേക്ക്​

new * കോട്ടയം ജില്ലയുടെ ഭാഗമായിരുന്ന ഉടുമ്പന്‍ചോല, പീരുമേട് താലൂക്കുകളും എറണാകുളം ജില്ലയുടെ ഭാഗമായിരുന്ന തൊടുപുഴ താലൂക്കും (കല്ലൂര്‍ക്കാട് വില്ലേജ്, മാഞ്ഞല്ലൂര്‍ വില്ലേജിന്‍റെ ഏതാനും ഭാഗങ്ങൾ എന്നിവ ഒഴിവാക്കി) ദേവികുളം താലൂക്കും ചേർത്താണ്​ ഇടുക്കി ജില്ല രൂപവത്​കരിച്ചത്​. ഡോ. ഡി. ബാബു പോൾ ആണ്​ ആദ്യ കലക്ടർ * കേരളത്തിലെ ഏറ്റവും വലിയ രണ്ടാമത്തെ ജില്ല. ജില്ലയുടെ 50 ശതമാനവും സംരക്ഷിത വനഭൂമിയാണ്​. വയനാട്​ കഴിഞ്ഞാൽ തീവണ്ടിപ്പാതയില്ലാത്ത ജില്ല ഇടുക്കിയാണ്​. * ഏഷ്യയിലെ ഏറ്റവും വലിയ അണക്കെട്ടുകളിലൊന്നായ ഇടുക്കി ഇന്ത്യയിലെ ഏറ്റവും വലിയ കമാന അണക്കെട്ടും രാജ്യത്തെ രണ്ടാമത്തെ ഏറ്റവും ഉയരം കൂടിയ അണക്കെട്ടും രാജ്യത്തെ ആദ്യ ഗ്രാവിറ്റി അണക്കെട്ടും കേരളത്തിലെ ഏറ്റവും വലിയ ജലവൈദ്യുതി പദ്ധതിയുമാണ്​​. * കേരളത്തിൽ ഏറ്റവും കൂടുതൽ ചന്ദനക്കാടുകൾ കാണപ്പെടുന്ന പ്രദേശമായ മറയൂർ ഇടുക്കി ജില്ലയിലാണ്‌. സമുദ്രനിരപ്പിൽനിന്ന് 2000 മീറ്ററിലധികം ഉയരമുള്ള 14 കൊടുമുടി ജില്ലയിലുണ്ട്​. * ഇടുക്കി, മുല്ലപ്പെരിയാർ, കുണ്ടള, മാട്ടുപ്പെട്ടി, ആനയിറങ്കൽ, പൊന്മുടി, കല്ലാർകുട്ടി, ലോവർപെരിയാർ, ചെറുതോണി, മലങ്കര, കുളമാവ്​ എന്നിങ്ങനെ ചെറുതും വലുതുമായി 14 അണക്കെട്ട്​ ഇടുക്കി ജില്ലയിലുണ്ട്​. കേരളത്തിനാവശ്യമായ വൈദ്യുതിയുടെ 66 ശതമാനവും ജില്ലയിലെ പദ്ധതികളിൽനിന്ന്​ ഉൽപാദിപ്പിക്കുന്നു. * കേരളത്തിലെ ആദ്യ ഗോത്രവർഗ പഞ്ചായത്ത്​ ഇടുക്കി ജില്ലയിലെ ഇടമലക്കുടിയാണ്​. 2010 നവംബർ ഒന്നിനാണ്​ ഇടമലക്കുടി പഞ്ചായത്ത്​ നിലവിൽ വന്നത്​. * 12 വര്‍ഷത്തിലൊരിക്കല്‍ പുഷ്പിക്കുന്ന നിലക്കുറിഞ്ഞിക്ക്‌ പ്രശസ്തമായ മൂന്നാർ, ചന്ദനമരങ്ങൾക്ക്‌ പ്രശസ്തമായ മറയൂർ, ചാമ്പല്‍ മലയണ്ണാനുകൾക്കും നക്ഷത്ര ആമകൾക്കും പ്രശസ്തമായ ചിന്നാര്‍ വന്യജീവി സങ്കേതം, രാജ്യത്തെ ആദ്യ മാതൃക കന്നുകാലി ഗ്രാമമായ മാട്ടുപ്പെട്ടി എന്നിവ ഇടുക്കി ജില്ലയിലാണ്​.