മട്ടാഞ്ചേരിയിൽ രണ്ടിടത്ത് തീപിടിത്തം

മട്ടാഞ്ചേരി: ഫോർട്ട്​കൊച്ചി, മട്ടാഞ്ചേരി മേഖലയിലായി രണ്ടിടത്ത് തീപിടിത്തം. കൽവത്തി സ്റ്റേറ്റ് ബാങ്കിനു സമീപത്തെ അംഗൻവാടിക്ക് പിറകിലെ ഒഴിഞ്ഞ പറമ്പിൽ സൂക്ഷിച്ചിരുന്ന മരത്തടികൾക്ക് തീപിടിച്ചു. ഞായറാഴ്ച ഉച്ചക്ക് രണ്ടോടെയാണ് തീ ഉയർന്നത്. നാട്ടുകാർ അറിയിച്ചതിനെത്തുടർന്ന് അഗ്​നിരക്ഷാ സേനയെത്തിയാണ് തീ അണച്ചത്. ഇത് ആറാം തവണയാണ് ഇവിടെ തീപിടിത്തം ഉണ്ടാകുന്നതെന്നാണ് അഗ്​നിരക്ഷാ സേനാ പ്രവർത്തകർ പറയുന്നത്. ഇവിടെ മരത്തടികൾ കൂട്ടിയിടരുതെന്ന് നേരത്തേ തന്നെ ആവശ്യപ്പെട്ടിരുന്നതായും മേഖലയിൽ മയക്കുമരുന്ന് ഉപയോഗിക്കുന്നവരുടെ ശല്യമുള്ളതായും നാട്ടുകാർ പറയുന്നു. മയക്കുമരുന്ന് ഉപയോഗിക്കുന്നവർ തീ കൊളുത്തിയതാകാമെന്നാണ് നാട്ടുകാർ ചുണ്ടിക്കാട്ടുന്നത്. ഫോർട്ട്​കൊച്ചി കുട്ടികളുടെ പാർക്കിന് സമീപത്തെ കൊച്ചിൻ പോർട്ടി‍ൻെറ പഴയ കെട്ടിട വളപ്പിൽ കൂട്ടിയിട്ടിരുന്ന മാലിന്യത്തിനും ഞായറാഴ്ച വൈകീട്ട് നാലോടെ തീ പിടിച്ചു. മട്ടാഞ്ചേരി അഗ്​നിരക്ഷാസേന വിഭാഗം അസി. ഫയർ ഓഫിസർ സി.പി. ബൈജുവി‍ൻെറ നേതൃത്വത്തിലെ സംഘമാണ് രണ്ടിട​ത്തെയും തീ അണച്ചത്. ചിത്രം: ഒഴിഞ്ഞ പറമ്പിൽ കൂട്ടിയിട്ടിരുന്ന മരങ്ങൾക്ക് തീപിടിച്ചത് അഗ്​നിരക്ഷ സേനാംഗങ്ങൾ അണക്കുന്നു