രവീന്ദ്രന്‍ പട്ടയം എന്നും വിവാദത്തിൽ

പത്തനംതിട്ട: രവീന്ദ്രന്‍ പട്ടയം വിതരണം ചെയ്​ത നാൾ മുതൽ അതേച്ചൊല്ലി വിവാദങ്ങളും തുടങ്ങി. സംസ്ഥാന നിയമസഭ പാസാക്കിയ കെ.ഡി.എച്ച്​ ആക്​​ടിലെ വ്യവസ്ഥ, പട്ടയം നൽകുന്നതിനുള്ള വ്യവസ്ഥ എന്നിവ ലംഘിച്ച്​ പട്ടയം നൽകേണ്ടത്​ ഭൂരഹിതർക്കാണെന്നിരിക്കെ രവീന്ദ്രൻ പട്ടയം നൽകിയത്​ മറ്റിടങ്ങളിൽ ഭൂമിയുള്ളവർക്ക്​. രവീന്ദ്രൻ നൽകിയ പട്ടയങ്ങളിൽ 250 എണ്ണം സാധുവാണെന്ന വി.എസ്.​ അച്യുതാനന്ദ​​ന്‍റെ വാദം, 2013 മാർച്ച്​ 15ന്​ രവീന്ദ്രൻ പട്ടയങ്ങൾ പൂർണമായും റദ്ദാക്കിയ ഹൈകോടതി വിധി, ഇതിനെതിരായ റിവ്യൂ ഹരജിയും തള്ളിയ 2015 മാർച്ച്​ നാലി​ലെ​ ഹൈകോടതി വിധി, 2007ലെ മൂന്നാർ ഒഴിപ്പിക്കൽ എന്നിവയെല്ലാം രവീന്ദ്രൻ പട്ടയത്തെ വിവാദമാക്കി. സ്വന്തമായി ഭൂമിയില്ലാത്തവർക്ക്​ വീട്​ വെക്കാനും കൃഷിക്കുമായാണ്​ പട്ടയം അനുവദിക്കാൻ വ്യവസ്ഥയുള്ളത്​. രവീന്ദ്രൻ പട്ടയത്തിലെ ഒന്നാം പേരുകാരൻ മുൻ മുഖ്യമന്ത്രി പി.കെ.വിയാണ്​. രണ്ടാമത്തെ പട്ടയം മുൻമന്ത്രി എം.എം. മണിയുടെ പേരിലാണ്​ നൽകിയത്​. പട്ടയം അനുവദിച്ച മഹസ്സർ റിപ്പോർട്ടിൽ പി.കെ. വാസുദേവൻ നായരും ഭാര്യയും കുടിൽകെട്ടി താമസിച്ചുവരുന്ന ഭൂമി എന്നാണ്​ പറയുന്നത്​. അഞ്ച്​ സൻെറിനാണ്​ പി.കെ.വിക്ക്​ പട്ടയം നൽകിയത്​. ഇപ്പോൾ അവിടെ​ സി.പി.ഐ പാർട്ടി ഓഫിസും റിസോർട്ടും നടത്തുന്നു. കൈവശം 12 സെ​ന്‍റോളമുണ്ട്​. രണ്ടാം പേരുകാരനായ എം.എം. മണിക്ക്​ 25 സൻെറിനാണ്​ പട്ടയം അനുവദിച്ചത്​. മണിയുടെ പേരിലും​ വേറെ ഭൂമിയുള്ളപ്പോഴായിരുന്നു പട്ടയം അനുവദിച്ചത്​. അവിടെ സി.പി.എമ്മി​ന്‍റെ പാർട്ടി ഓഫിസും റിസോർട്ടും പ്രവർത്തിക്കുന്നു. രവീന്ദ്രൻ വിതരണം ചെയ്​ത 530 പട്ടയത്തിൽ എല്ലാവരും വേറെ ഭൂമിയുള്ളവരായിരുന്നു. ഇവരുടെ പട്ടയം റദ്ദാക്കാനാണ്​ ഇപ്പോൾ സർക്കാർ തീരുമാനിച്ചിരിക്കുന്നത്​. പട്ടയഭൂമികളിൽ വീടുവെച്ച്​ താമസിക്കുന്നവർ വിരലിലെണ്ണാവുന്നവർ മാത്രമാണ്​. രവീന്ദ്രൻ പട്ടയം ലഭിച്ചതെല്ലാം റിസോർട്ട്​ മാഫിയകൾക്കായിരുന്നു എന്നതാണ്​ അന്നേ രവീന്ദ്രൻ പട്ടയത്തെച്ചൊല്ലി വിവാദം ഉയരാൻ കാരണമായത്​. നായനാർ സർക്കാർ രവീന്ദ്രനോട് അനുവദിക്കാൻ നിർദേശിച്ചത്​ 250 പട്ടയമായിരുന്നു. ഈ പട്ടയങ്ങളുടെ അപേക്ഷ പരിശോധിച്ച്​ അർഹരാണോ എന്ന്​ കണ്ടെത്താൻ അന്ന്​ ജനകീയ കമ്മിറ്റിയെ സർക്കാർ നിയോഗിച്ചിരുന്നു. ഈ കമ്മിറ്റി അംഗീകരിച്ചത്​ 250 പട്ടയം മാത്രമായതിനാലാണ്​ വി.എസ്.​ അച്യുതാനന്ദൻ 250 പട്ടയം അഗീകരിക്കാമെന്ന നിലപാടെടുത്തത്​. അതിലും ഭൂരഹിതർ ആരുമില്ലെന്നത്​ തർക്കവിഷയമായതോടെയാണ്​ വി.എസ്​ സർക്കാറി​ന്‍റെ കാലത്ത്​ നടന്ന മൂന്നാർ ഒഴിപ്പിക്കൽ ദൗത്യം എങ്ങുമെത്താതെ അവസാനിപ്പിച്ചത്​. ബിനു ഡി. രവീന്ദ്രൻ കലക്​ടറുടെ അധികാരവും ഉപയോഗിച്ചു പത്തനംതിട്ട: 1971ലെ കെ.ഡി.എച്ച്​ ആക്​ട്​ (കണ്ണൻ ദേവൻ ഹിൽസ്​ ഏറ്റെടുക്കൽ നിയമം) പ്രകാരം സർക്കാർ ഏറ്റെടുത്ത കണ്ണൻദേവൻ വില്ലേജിലെ ഭൂമിയിൽ പട്ടയം അനുവദിക്കാനുള്ള അധികാരം നൽകുന്നത്​ ജില്ല കലക്​ടർക്കാണ്. പട്ടയം അനുവദിക്കുന്ന വേളയിൽ രവീന്ദ്രൻ​ ഡെപ്യൂട്ടി തഹസിൽദാർ മാത്രമായിരുന്നു. എന്നിട്ടും കെ.ഡി.എച്ച്​ ആക്​ട്​ പ്രകാരം സർക്കാർ ഏറ്റെടുത്ത ഭൂമിയിലും രവീന്ദ്രൻ പട്ടയം അനുവദിച്ചു. ഇല്ലാത്ത അധികാരവും ഉപയോഗിച്ചത്​ കണ്ടതിനാലാണ്​ ഹൈകോടതി 2013 മാർച്ച്​ 15ന്​ രവീന്ദ്രൻ പട്ടയങ്ങൾ പൂർണമായും റദ്ദാക്കിയത്​. സർക്കാർ പുറമ്പോക്ക്​ ഭൂമിക്ക്​ പട്ടയം നൽകാൻ തഹസിൽദാർക്കാണ്​ അധികാരം. രവീന്ദ്രൻ അഡീഷനൽ തഹസിൽദാർ ആയിരുന്നു എന്നതും പട്ടയം നൽകാൻ അധികാരമുണ്ടോ എന്നതിൽ തർക്കവിഷയമാണ്​. നായനാർ സർക്കാർ അനുവദിച്ചത്​ 250 പട്ടയം നൽകാനായിരുന്നെങ്കിലും അതി​ന്‍റെ ഇരട്ടിയിലേറെ പട്ടയങ്ങൾ രവീന്ദ്രൻ അനുവദിക്കുകയായിരുന്നു. ആദ്യ 250 പട്ടയത്തിൽ ഭൂരിഭാഗവും ഇടതുമുന്നണിക്ക്​ വേണ്ടപ്പെട്ടവർക്കായിരുന്നു. പിന്നീടുള്ളവയിൽ യു.ഡി.എഫുകാരും ഉൾപ്പെട്ടതിനാലാണ്​ അവർ അധികാരത്തിൽ വന്നപ്പോഴും പട്ടയങ്ങൾ റദ്ദാക്കാതിരുന്നത്​.