കോന്തുരുത്തി പുഴ പുറമ്പോക്ക്​ കൈയേറ്റം: ഒഴിപ്പിക്കൽ നടപടികളിലേക്ക്​ കോർപറേഷൻ

കൊച്ചി: കോന്തുരുത്തി പുഴ പുറമ്പോക്ക്​ കൈയേറ്റം ഒഴിപ്പിക്കൽ നടപടികളിലേക്ക്​​ വീണ്ടും കോർപറേഷൻ. ഹൈകോടതി വിധിയുടെ അടിസ്ഥാനത്തിൽ ​കൈയേറ്റം ഒഴിപ്പിച്ച് പുഴയുടെ പൂർവ സ്​ഥിതി പുനഃസ്​ഥാപിക്കാൻ നഗരസഭ സ്വീകരിച്ച നടപടി അറിയിക്കണമെന്ന്​ കലക്ടർ കോർപറേഷന്​ നൽകിയ കത്തി‍ൻെറ അടിസ്ഥാനത്തിലാണ്​ ഇടപെടലിന്​ ചൂടുപിടിക്കുന്നത്​. വ്യാഴാഴ്ച നടക്കുന്ന കൗൺസിൽ യോഗം ഇതുസംബന്ധിച്ച്​ തീരുമാനമെടുക്കും. സ്വകാര്യ വ്യക്​തി നൽകിയ കേസിലാണ്​ പുഴ കൈയേറ്റം ഒഴിപ്പിക്കാൻ ഹൈകോടതി 2020 ജൂണിൽ ഉത്തരവിട്ടത്​. പുഴയുടെ പുറമ്പോക്ക്​ കൈയേറ്റം കണ്ടെത്താൻ നടത്തിയ സർവേയും സ്ഥലം പരിശോധനയും കഴിഞ്ഞ്​ തയാറാക്കിയ റിപ്പോർട്ടിൽ പുറമ്പോ​ക്കിൽ 131 കെട്ടിടങ്ങൾ കണ്ടെത്തിയിരുന്നു. ഇതിൽ ആറു കെട്ടിടങ്ങൾക്ക് നമ്പർ ഇല്ല. രണ്ട്​ കെട്ടിടങ്ങളുടെ ഉടമസ്​ഥരെ നേരിൽ കണ്ടിട്ടുമില്ല. ഇതുകഴിച്ച്​ 123 കെട്ടിടം ഉടമകളുടെ ലിസ്റ്റാണ്​ പ്രസിദ്ധീകരിച്ചത്​. പുഴയുടെ 48 മീറ്റർ വീതിയിൽ പുനഃസ്​ഥാപിക്കുന്നതിന് കർമ പദ്ധതി തയാറാക്കണമെന്ന്​ ഹൈകോടതി ഉത്തരവിലുണ്ട്​. പുഴയുടെ വീതി നീരൊഴുക്കിനും ജലഗതാഗതത്തിനും ആവശ്യമായ 16 മീറ്ററിൽ എത്തിക്കാൻ നടപടി എടുക്കാമെന്ന് കോർപറേഷൻ സ്റ്റിയറിങ്​ കമ്മിറ്റി തീരുമാനം 2019 ഡിസംബറിൽ അംഗീകാരം നൽകിയെങ്കിലും ഹൈകോടതി അംഗീകരിച്ചിരുന്നില്ല. കുടിയൊഴിപ്പിക്കേണ്ടി വരുന്നവർക്ക്​ ജില്ലയിൽ മറ്റ് സ്​ഥലമോ വാസയോഗ്യമായ ഭവനമോ ഇല്ലെങ്കിൽ ഭവനം ഫൗണ്ടേഷൻ വഴി പുനരധിവസിപ്പിക്കണമെന്ന് അറിയിച്ചിട്ടുണ്ട്​. ഇതിനായി സ്​ഥലം കണ്ടെത്താനും കെട്ടിട സമുച്ചയം നിർമിക്കാനുമായി ആകെ 21 മാസം വേണമെന്നാണ്​ കണക്കാക്കുന്നത്​. അതുവരെ അർഹർക്ക് താൽക്കാലിക താമസ സൗകര്യം ഒരുക്കുകയോ വാടക തുക നൽകുകയോ ചെയ്യണമെന്ന് നിർദേശിച്ചിട്ടുണ്ട്​. കൈയേറ്റക്കാരെ ഒഴിപ്പിക്കാനും താൽക്കാലിക താമസ സൗകര്യം ഒരുക്കാനും കൊച്ചി നഗരസഭക്കാണ് ചുമതല​. നഗരസഭ താമസസൗകര്യം ഒരുക്കുകയോ അല്ലെങ്കിൽ വാടക തുക അർഹർക്ക് നൽകുകയോ വേണം. പ്രവൃത്തികൾ 30 ദിവസത്തിനകം പൂർത്തിയാക്കണമെന്നും അറിയിച്ചിട്ടുണ്ട്​. ഒരുതവണ കൗൺസിൽ യോഗം മാറ്റിവെച്ച അജണ്ടയാണ്​ വീണ്ടും ചർച്ചക്ക്​ എത്തുന്നത്​.