തന്ത്രങ്ങൾ പാളി; ചോർന്നത്​ ഉറച്ച വോട്ടുകൾ

കൊച്ചി: ഒരു വശത്ത്​ ശേഖരിച്ചപ്പോൾ മറുവശത്ത്​ കൂടി വോട്ടുകൾ ചോർന്ന​ത്​ തൃക്കാക്കരയിൽ എൽ.ഡി.എഫ്​ പരാജയത്തിന്​ ആക്കം കൂട്ടി. ഒരു സമുദായത്തിന്‍റെ പ്രതിനിധിയായി സ്ഥാനാർഥിയെ ഉയർത്തിക്കാട്ടാൻ ശ്രമമുണ്ടായപ്പോൾ എൽ.ഡി.എഫി​നൊപ്പംനിന്ന ഇതര സമുദായ വോട്ടുകളിലുണ്ടായ ചോർച്ചക്കപ്പുറം പാർട്ടി അണികളിലുണ്ടായ അതൃപ്തിയും അമർഷവും വോട്ടിങ്ങിൽ പ്രതിഫലിച്ചു​. നേതൃത്വത്തി‍ൻെറ അപ്രമാദിത്വത്തിലും ഭരണ വൈകല്യത്തിലും കെ-റെയിൽ പോലുള്ള പദ്ധതികൾ നടപ്പാക്കാനുള്ള അനാവശ്യ വാശിയിലും അതൃപ്തരായ പാർട്ടി ബന്ധമുള്ളവർ സർക്കാറിന്​ ഷോക്ക്​ ട്രീറ്റ്​മെന്‍റ്​ നൽകാനുള്ള അവസരമാക്കി ഉപതെരഞ്ഞെടുപ്പിനെ കണ്ടുവെന്നാണ്​ വിലയിരുത്തൽ. 3633 പുതിയ വോട്ടർമാർ മാത്രമുണ്ടായിരുന്ന മണ്ഡലത്തിൽ 2244 വോട്ട്​ കഴിഞ്ഞ തവണത്തേക്കാൾ അധികം കിട്ടി​യെന്ന പേരിൽ പാർട്ടിക്കും മുന്നണിക്കും തടിതപ്പാനാവില്ല. പതിനായിരത്തോളം വോട്ടുകളാണ്​ നേതൃത്വം അധികം പ്രതീക്ഷിച്ചത്​. നിലവിലെ എൽ.ഡി.എഫ്​ വോട്ടിനൊപ്പം ഇതുകൂടി ചേരുമ്പോൾ 5000ൽ താഴെ വോട്ടുകൾക്ക്​ ജയിച്ചു കയറാമെന്നായിരുന്നു പ്രതീക്ഷ. സഭയുടെ ഒരു വിഭാഗത്തി‍ൻെറയും മന്ത്രിമാരടക്കം നടത്തിയ പ്രചാരണ പ്രവർത്തനങ്ങളുടെ ഫലമായി പുതിയ വോട്ടുകളിലെറെയും എൽ.ഡി.എഫിന്​ കിട്ടിയിട്ടുണ്ടെന്നാണ്​ സൂചന. ട്വന്‍റി ട്വന്‍റി വോട്ടും എൽ.ഡി.എഫിന്​ കിട്ടിയിട്ടുണ്ട്​​. അങ്ങനെയെങ്കിൽ എൽ.ഡി.എഫ്​ ശക്​തികേന്ദ്രങ്ങളായ ബൂത്തുകളിൽ വൻതോതിൽ ഇടത്​ സ്ഥാനാർഥിക്ക്​ വോട്ട്​ ലഭിക്കേണ്ടതായിരുന്നു. ജയത്തിലെത്തിയില്ലെങ്കിലും യു.ഡി.എഫ്​ ഭൂരിപക്ഷം ഗണ്യമായി കുറക്കാനെങ്കിലും കഴിയേണ്ടതായിരുന്നു. അത്​ ലഭിച്ചിട്ടില്ലാത്ത സാഹചര്യം എൽ.ഡി.എഫി‍ൻെറ ഉറച്ച വോട്ടുകളിൽ ചോർച്ചയുണ്ടായി എന്നതിലേക്കാണ്​​ വിരൽചൂണ്ടുന്നത്​. ജില്ല കമ്മിറ്റിയം​ഗത്തെ സ്ഥാനാർഥിയാക്കാനുള്ള നീക്കം ഉപേക്ഷിച്ച്​ മറ്റൊരാളെ അവതരിപ്പിച്ചത്​ മുതൽ സാമുദായിക ധ്രുവീകരണത്തിന്​ പാർട്ടിയും മുന്നണിയും ശ്രമിക്കുന്നുവെന്ന ആരോപണം ഉയർന്നിരുന്നു. ജില്ല കമ്മിറ്റി തീരുമാനത്തിന്​ മേൽ ജില്ലയുടെ ചുമതലയുള്ള മന്ത്രിയും ചില സംസ്ഥാന നേതാക്കളും ചേർന്ന്​ അടിച്ചേൽപ്പിച്ചതാണ്​ സ്ഥാനാർഥിയെന്ന ആരോപണവും ശക്​തമായിരുന്നു. വിജയിക്കാൻ സഭയെ ആശ്രയിക്കുന്നതിൽ എൽ.ഡി.എഫിനകത്ത്​ പ്രത്യേകിച്ച്​ സി.പി.എമ്മിൽ എതിർപ്പ്​ പുകഞ്ഞെങ്കിലും ഉന്നത നേതാക്കളുടെ സാന്നിധ്യത്തിൽ അത്​ തുറന്നുപറയാൻ ആരും ധൈര്യം കാട്ടിയില്ല. വോട്ടിങ്ങിൽ ഈ എതിർപ്പ്​ പ്രതിഫലിപ്പിച്ചുവെന്നാണ്​ ഫലം തെളിയിക്കുന്നത്​. പ്രചാരണ വേദികളിൽ പോലും അർഹമായ സ്ഥാനം ജില്ല നേതാക്കൾക്ക്​ ലഭിച്ചിരുന്നില്ല. മണ്ഡലത്തിൽ സജീവമായിരുന്ന ജില്ല, ഏരിയ നേതാക്കൾ തെരഞ്ഞെടുപ്പായതോടെ പുറന്തള്ളപ്പെടുന്ന അവസ്ഥയുണ്ടായി. എൽ.ഡി.എഫ്​ സ്ഥാനാർഥി വിജയിച്ചാൽ ജില്ല കമ്മിറ്റിയുടെ പ്രസക്​തിതന്നെ ഇല്ലാതാകുന്ന അവസ്ഥയിലേക്കെത്തി കാര്യങ്ങൾ. സാമുദായിക പ്രീണന നയം കൂടി നേതൃത്വത്തി‍ൻെറ ഭാഗത്തുനിന്ന്​ ഉണ്ടായതോടെ അതൃപ്തി പാർട്ടിയുടെ താഴേത്തട്ടിലേക്കും പടർന്നതായാണ്​ സൂചനകൾ. പാർട്ടി അംഗങ്ങളടക്കമുള്ളവരുടെ വോട്ടുകൾ പലയിടങ്ങളിലും നഷ്ട​മായെന്ന സൂചനകൾ വരും ദിവസങ്ങളിൽ സി.പി.എമ്മിനെ കുറച്ചൊന്നുമല്ല അലട്ടുക. 2021ലെ തെരഞ്ഞെടുപ്പിന്​ ശേഷം മുന്നണി സ്ഥാനാർഥിക്കെതിരെ പ്രവർത്തിച്ചതി‍ൻെറയും വിജയത്തിനായി പ്രവർത്തിക്കാതിരുന്നതി‍ൻെറയും പേരിൽ തൃക്കാക്കര മണ്ഡലത്തിൽ ഒട്ടേറെ നേതാക്കൾക്കെതിരെ പാർട്ടി നടപടിയെടുത്തിരുന്നു. പുതിയ സാഹചര്യത്തിൽ കൂട്ട നടപടിക്ക്​ വഴിയൊരുങ്ങിയിരിക്കുന്നതായി വേണം കരുതാൻ. subair