ഗുരുവായൂർ ആനക്കോട്ടയിൽ പണം വാങ്ങി ആളെ കയറ്റുന്നത്​ നിയമവിരുദ്ധമെന്ന്​

കൊച്ചി: ഗുരുവായൂർ ആനക്കോട്ടയിൽ പണം വാങ്ങി ആളുകളെ കയറ്റുന്നത് കേന്ദ്ര നിയമങ്ങളുടെ ലംഘനമെന്ന്​ അഭിഭാഷക കമീഷൻ. ഹൈകോടതി നിയോഗിച്ച അഭിഭാഷക കമീഷൻ സ്ഥലം സന്ദർശിച്ച്​ തയാറാക്കിയ റിപ്പോർട്ടിലാണ് ഇക്കാര്യം പറയുന്നത്. ദേശീയ മൃഗശാല അതോറിറ്റിയുടെ അംഗീകാരമില്ലാതെയാണ് സന്ദർശകരിൽനിന്ന്​ പണം വാങ്ങുന്നത്. ശുചിത്വമില്ലാത്ത അവസ്ഥയിലാണ്​ ആനക്കോട്ട​. ആനകളെ പാർപ്പിക്കാൻ എണ്ണത്തിനനുസരിച്ച്​ ഷെഡുകളില്ലെന്നും റിപ്പോർട്ടിലുണ്ട്.

ആനക്കോട്ടയിൽ 41 ആനകളിൽ 15 എണ്ണം മദപ്പാടുള്ളവയാണ്​​. രോഗമുള്ളവക്ക് പ്രത്യേക ഷെഡുകൾ ഇല്ലെന്ന്​ മാത്രമല്ല, ആനകൾക്കെല്ലം കൂടി 30 ഷെഡുകൾ മാത്രമാണുള്ളത്​. ഇവിടെനിന്നുള്ള മാലിന്യനീക്കം കാര്യക്ഷമമല്ല. ആനകളെ ബന്ധിപ്പിച്ചിട്ടുള്ളിടങ്ങളിൽതന്നെ നിർത്തി കുളിപ്പിക്കുകയാണ്​​. ഇതിനായി കുളങ്ങളും മറ്റും ഉപയോഗിക്കുന്നില്ല. ആനക​​ൾക്കെല്ലാം സഞ്ചാരം നടത്താൻ ആകെയുള്ളത്​ ഒരു കിലോമീറ്റർ നടപ്പാത മാത്രമാണ്​. പുല്ലും പച്ചക്കറികളും പഴങ്ങളും അടക്കമുള്ള ഭക്ഷണം​ നൽകുന്നു​വെന്നാണ്​​ പറയുന്നതെങ്കിലും പനമ്പട്ടയല്ലാത്തതൊന്നും കാണാനായില്ല. 20 ആനകൾക്കല്ലാതെ മറ്റൊന്നിനും ഉടമസ്ഥാവകാശ സർട്ടിഫിക്കറ്റില്ലെന്ന ഡിവിഷനൽ ഫോറസ്റ്റ് ഓഫിസറുടെ കണ്ടെത്തലും റിപ്പോർട്ടിനൊപ്പമുണ്ട്.

അസുഖബാധിതരായ ആനകൾക്ക് പ്രത്യേക ഷെഡുകളൊരുക്കുന്നതടക്കം ഷെഡുകളുടെ എണ്ണം വർധിപ്പിക്കണമെന്ന്​ റിപ്പോർട്ടിൽ ആവശ്യപ്പെടുന്നു. ആനകളെ ബന്ധിക്കുന്നിടങ്ങളിൽ തണൽ ഒരുക്കണം. മാലിന്യനീക്കം കാര്യക്ഷമമാക്കുകയും പ്രായമായ ആനകൾക്ക് പനമ്പട്ടക്ക്​ പകരം കൂടുതൽ പുല്ല് നൽകുകയും വേണം. അസി. ഫോറസ്റ്റ് വെറ്ററിനറി ഓഫിസർ, ഡിവിഷനൽ ഫോറസ്റ്റ് ഓഫിസർ എന്നിവരുടെ കണ്ടെത്തലുകളും നിർദേശങ്ങളും ഉൾപ്പെടുത്തിയാണ്​ അഭിഭാഷക കമീഷന്‍റെ റിപ്പോർട്ട്.