എയ്ഡഡ് ഹൈസ്കൂൾ: 1:40 അനുപാതം ഈ വർഷം കൂടി

തിരുവനന്തപുരം: എയ്ഡഡ് ഹൈസ്കൂളുകളിൽ ഒമ്പത്, 10 ക്ലാസുകളിൽ തസ്തിക നഷ്ടം വരുന്ന അധ്യാപകരെ സംരക്ഷിക്കാൻ അനുവദിച്ച 1:40 എന്ന അധ്യാപക-വിദ്യാർഥി അനുപാതം ഈ അധ്യയന വർഷം കൂടി തുടരാൻ മന്ത്രിസഭ യോഗം തീരുമാനിച്ചു.ഇളവ് അവസാനിപ്പിക്കാനും 1:45 അനുപാതം പുനഃസ്ഥാപിക്കാനും നേരത്തേ തീരുമാനിച്ചിരുന്നു. അനുപാതത്തിലെ മാറ്റം വഴി ഒട്ടേറെ പേർക്ക് തസ്തിക നഷ്ടം വരുമെന്ന് പരാതി വന്നതോടെയാണ് ഇളവിന് തീരുമാനിച്ചത്.

വിദ്യാഭ്യാസ അവകാശനിയമ പ്രകാരം ഒന്നു മുതൽ അഞ്ചു വരെ ക്ലാസുകളിൽ 1:30, ആറ് മുതൽ എട്ടു വരെ 1:35 എന്നിങ്ങനെയാണ് അധ്യാപക-വിദ്യാർഥി അനുപാതം. ഒമ്പത്, 10 ക്ലാസുകളിൽ 1:45 ആണ് അനുപാതം. ഒമ്പത്, 10 ക്ലാസുകളിലെ തസ്തികകളിൽ ജോലി ചെയ്യുന്നവരെ സംരക്ഷിക്കാൻ വർഷങ്ങൾക്ക് മുമ്പ് കൊണ്ടുവന്ന ക്രമീകരണമായിരുന്നു 1:40 എന്ന ഇളവ് അനുപാതം.

സംരക്ഷണമുള്ള അധ്യാപകരുടെ പുനർവിന്യാസത്തിനായി എയ്ഡഡ് സ്കൂളുകളിൽ കുട്ടികൾ വർധിച്ചുണ്ടാകുന്ന അധിക തസ്തികകൾ 1:1 എന്ന അനുപാതത്തിൽ സർക്കാർ ഏറ്റെടുക്കുകയും ചെയ്തിരുന്നു.തസ്തിക നഷ്ടപ്പെടുന്ന സംരക്ഷണ ആനുകൂല്യമുള്ള അധ്യാപകരെ അധ്യാപക ബാങ്കിൽ ഉൾപ്പെടുത്തുകയും മറ്റ് എയ്ഡഡ് സ്കൂളുകളിലേക്ക് പുനർവിന്യസിക്കുകയും ചെയ്യുന്നതാണ് രീതി.

2014-15 വരെ നിയമിക്കപ്പെട്ട അധ്യാപകർക്കാണ് നിലവിൽ സംരക്ഷണ ആനുകൂല്യം. ഇളവ് നിർത്തലാക്കിയതോടെ 2014ന് ശേഷം നിയമിക്കപ്പെട്ടവർ കുട്ടികൾ കുറഞ്ഞ് തസ്തിക നഷ്ടമായാൽ സർവിസിൽനിന്ന് പുറത്താകുന്ന സാഹചര്യം വന്നിരുന്നു.