കെ.എസ്.ആർ.ടി.സി ബസ് സ്കൂട്ടറിലിടിച്ച് മൂന്നാം ക്ലാസുകാരി മരിച്ചു

കൂത്താട്ടുകുളം: എം.സി റോഡിൽ പാലക്കുഴ അമ്പലംകുന്ന് പെട്രോൾ പമ്പിന് സമീപം കെ.എസ്.ആർ.ടി.സി ബസ് സ്കൂട്ടറിലിടിച്ച് അമ്മയോടൊപ്പം സ്കൂട്ടറിൽ യാത്രചെയ്തിരുന്ന എട്ടുവയസ്സുള്ള മകൾ മരിച്ചു. കൂത്താട്ടുകുളം ഇടയാർ കൊച്ചുമലയിൽ കെ.എ. അരുണിന്‍റെയും അശ്വതിയുടെയും മകൾ ആരാധ്യയാണ്​ (എട്ട്) അപകടത്തിൽ തൽക്ഷണം മരിച്ചത്.​ആരാധ്യയുടെ അമ്മ അശ്വതി (36), സഹോദരി ആത്മി (നാല്) എന്നിവർക്ക് പരിക്കേറ്റു. വ്യാഴാഴ്ച വൈകീട്ട്​ 3.45ഓടെയാണ് അപകടം.

അപകടത്തിൽ ബസിന്‍റെ അടിയിൽ വീണ ആരാധ്യയെ രക്ഷിക്കാൻ പമ്പിലെ ജീവനക്കാരി അലമുറയിട്ട് ഓടിയെത്തിയപ്പോഴേക്കും ബസ് മുന്നോട്ടെടുത്തു. ബസിന്റെ പിൻചക്രം തലയിലൂടെ കയറിയിറങ്ങി കുട്ടി തൽക്ഷണം മരിക്കുകയായിരുന്നു. മൃതദേഹം കൂത്താട്ടുകുളം പൊലീസും അഗ്​നിരക്ഷാസേനയുമെത്തി കൂത്താട്ടുകുളത്തെ സ്വകാര്യ ആശുപത്രിയിലേക്ക് മാറ്റി. അമ്മയും ഇളയ കുട്ടിയും ചെറിയ പരിക്കുകളോടെ രക്ഷപ്പെട്ടു. സ്കൂളിൽ ഡാൻസ് അവതരിപ്പിക്കുന്നതിന് ഡ്രസ്സ്​ എടുക്കാൻ കൂത്താട്ടുകുളത്തേക്ക്​ വരുംവഴിയായിരുന്നു അപകടം.

മരിച്ച ആരാധ്യ പാമ്പാക്കുട അഡ്വഞ്ചർ സ്കൂളിലെ മൂന്നാം ക്ലാസ് വിദ്യാർഥിനിയാണ്. ഇതേ സ്കൂളിലെ അധ്യാപികയാണ് അമ്മ അശ്വതി. പാലക്കുഴ ഉപ്പുകണ്ടത്ത്​ അമ്മയോടൊപ്പം വാടകവീട്ടിലാണ് അശ്വതി താമസിക്കുന്നത്. സിങ്കപ്പൂരിൽ ഹോട്ടൽ ജീവനക്കാരനായ അച്ഛൻ അരുൺ വെള്ളിയാഴ്ച നാട്ടിലെത്തും. സംസ്കാരം വെള്ളിയാഴ്ച വൈകീട്ട്​ പെരിയപ്പുറം സെന്‍റ്​ ജോസഫ് കത്തോലിക്ക പള്ളി സെമിത്തേരിയിൽ.