പതഞ്ജലി ഉൽപന്നങ്ങൾക്കുള്ള നിരോധനം നീക്കി ഉത്തരഖണ്ഡ്

ന്യൂഡൽഹി: പതഞ്ജലി ഉൽപന്നങ്ങൾക്കുള്ള നിരോധനം ഉത്തരഖണ്ഡ് സർക്കാർ നീക്കി. സംസ്ഥാന ആയുർവേദ ആൻഡ് യുനാനി ലൈസൻസിങ് അതോറിറ്റിയുടേതാണ്​ നടപടി.

രക്തസമ്മർദം, പ്രമേഹം, കൊളസ്ട്രോൾ തുടങ്ങിയ അസുഖങ്ങൾ ഭേദപ്പെടുത്തുമെന്ന്​ അവകാശപ്പെട്ട് വിപണിയിലെത്തിച്ച ബി.പിഗ്രിത്, മധുഗ്രിത്, തൈറോഗ്രിത്, ലിപിഡോം ഐഗ്രിത്, ഗോൾഡ് ടാബ്‍ലറ്റ് എന്നിവയുടെ ഉൽപാദനം​ നവംബർ ഒന്നിന്​ സംസ്ഥാന സർക്കാർ നിരോധിച്ചിരുന്നു. ബാബാ രാംദേവിന്‍റെ ഉടമസ്ഥതയിലുള്ള പതഞ്ജലിയുടെ സഹസ്ഥാപനമായ ദിവ്യ ഫാർമസിയാണ് ഇവ നിർമിച്ചിരുന്നത്.

നിരോധനം തങ്ങൾക്ക് സംഭവിച്ച തെറ്റാണെന്നും ഉൽപാദനം തുടരാൻ ദിവ്യ ഫാർമസിക്ക് അനുമതി നൽകിയിട്ടുണ്ടെന്നും അധികൃതർ വ്യക്​തമാക്കി. സംഭവിച്ച തെറ്റ് കൃത്യസമയത്ത് തിരുത്തിയതിന് ഉത്തരഖണ്ഡ് സർക്കാറിനോട് നന്ദിയുണ്ടെന്ന് പതഞ്ജലി ഗ്രൂപ് വക്താവ്​ പ്രതികരിച്ചു.