'മത്സരിക്കാൻ കിട്ടിയതേറെയും തോൽക്കുന്ന സീറ്റുകൾ'; വിമർശനങ്ങൾക്ക്​ കോൺഗ്രസി​െൻറ മറുപടി

പറ്റ്​ന: ബിഹാർ തെരഞ്ഞെടുപ്പിൽ അധികാരത്തിലെത്തുമെന്ന്​ കരുത​െപ്പട്ടിരുന്ന മഹാസഖ്യത്തിന്​ തിരിച്ചടിയേറ്റപ്പോൾ വിമർശന മുനകൾ നീളുന്നത്​ കോൺഗ്രസിന്​ നേരെയാണ്​. 70 സീറ്റുകളിൽ മത്സരിച്ച പാർട്ടിക്ക്​ ജയിക്കാൻ കഴിഞ്ഞത്​ 19 സീറ്റുകളിൽ മാത്രം. മത്സരിച്ച മുഖ്യകക്ഷികളിൽ ഏറ്റവും കുറഞ്ഞ വിജയശതമാനവും കോൺഗ്രസി​േൻറതാണ്​. മഹാസഖ്യത്തി​െൻറ പരാജയത്തിന്​ വഴിയൊരുക്കിയത്​ പകുതി സീറ്റിൽപോലും വിജയത്തിലെത്താൻ കഴിയാതെപോയ കോൺഗ്രസാണെന്ന്​ ഒപ്പമുള്ളവർ തന്നെ കുറ്റപ്പെടുത്തുന്നു. എന്നാൽ, ഈ കനത്ത തിരിച്ചടിക്കിടയിലും​ ന്യായവാദങ്ങളുമായി കോൺഗ്രസ്​ രംഗത്തെത്തിയിട്ടുണ്ട്​. മഹാസഖ്യത്തിലെ രണ്ടാമത്തെ വലിയ കക്ഷിയായ തങ്ങൾക്ക്​ കഴിഞ്ഞ തവണത്തേക്കാൾ സീറ്റുകൾ ലഭിച്ചെങ്കിലും മത്സരിക്കാൻ ലഭിച്ചതേറെയും എതിരാളികൾക്ക്​ സ്വാധീനമുള്ള മണ്ഡലങ്ങളായിരുന്നുവെന്ന്​ കോൺഗ്രസ്​ നേതാക്കൾ ചൂണ്ടിക്കാട്ടുന്നു.

നിരന്തര ചർച്ചകൾക്കൊടുവിൽ 2015ൽ മത്സരിച്ചതിനേക്കാൾ 30 സീറ്റുകൾ അധികം കോൺഗ്രസിന്​ നൽകാൻ ആർ.ജെ.ഡി സമ്മതിക്കുകയായിരുന്നു. എന്നാൽ, ഈ സീറ്റ്​ വിഭജനം 'പാര'യായതായി കോൺഗ്രസ്​ വിലയിരുത്തുന്നു. എണ്ണത്തിൽ കൂടുതൽ സീറ്റുകൾ കിട്ടിയെന്നല്ലാതെ വലിയ കാര്യമില്ലെന്ന്​ അന്നേ പാർട്ടി നേതാക്കൾ പലരും ചൂണ്ടിക്കാട്ടിയിരുന്നു. 70 സീറ്റുകൾ ലഭിച്ചതിൽ 45ഉം എൻ.ഡി.എയുടെ ശക്​തികേന്ദ്രങ്ങളായിരുന്നു. കഴിഞ്ഞ നാലു തെരഞ്ഞെടുപ്പുകളിൽ കോൺഗ്രസ്​ ജയിച്ചിട്ടില്ലാത്ത മണ്ഡലങ്ങളായിരുന്നു ഇവ.

ആർ.ജെ.ഡി കോൺഗ്രസിന്​ വിട്ടുനൽകിയ 20 മണ്ഡലങ്ങളുടെയും അവസ്​ഥ അതുതന്നെയായിരുന്നു. കഴിഞ്ഞ രണ്ടു ദശകങ്ങളിൽ ആർ.ജെ.ഡി ജയിക്കാത്തവയായിരുന്നു അവ. അതിനുപുറമെ, ഇടതു പാർട്ടികൾ വിലപേശി വാങ്ങിയ സീറ്റുകളിൽ ചിലത്​ പരമ്പരാഗത കോൺഗ്രസ്​ സീറ്റുകളായിരുന്നുവെന്നും പാർട്ടി നേതാക്കൾ ചൂണ്ടിക്കാട്ടുന്നു.

ഇതിനുപുറമെ, സ്​ഥാനാർഥി നിർണയത്തിലെ പാളിച്ചകൾ പാർട്ടിക്ക്​ തിരിച്ചടിയായെന്ന്​ തെരഞ്ഞെടുപ്പിനുശേഷം വിലയിരുത്തപ്പെടുത്തപ്പെടുന്നുണ്ട്​. സ്​ഥാനാർഥി നിർണയ സമിതിയിലെ മുതിർന്ന നേതാക്കന്മാർക്കെതിരെയാണ്​ ആരോപണമുയരുന്നത്​. പ്രചാരണത്തിലെ പൊലിമക്കുറവ്​, സീമാഞ്ചൽ മേഖലയിൽ എ.ഐ.എം.ഐ.എമ്മി​െൻറ കടന്നുകയറ്റം, മൂന്നു പതിറ്റാണ്ടായി ലാലു പ്രസാദ്​ യാദവി​െൻറ ബി ടീമായി ഒതുങ്ങിക്കൂടുന്നത്​ തുടങ്ങി ഒ​ട്ടേറെ ഘടകങ്ങളും തിരിച്ചടികൾക്ക്​ ആക്കം കൂട്ടി.