ന്യൂഡൽഹി: കോൺഗ്രസ് നേതാവ് രാഹുൽ ഗാന്ധി ഇന്ന് ജമ്മുവിലെത്തും. രണ്ട് ദിവസത്തെ സന്ദർശനത്തിനായാണ് രാഹുലെത്തുന്നത്. ജമ്മുവിലെ മാതാ വൈഷ്ണോ ദേവി ക്ഷേത്രത്തിൽ അദ്ദേഹം ദർശനം നടത്തുമെന്ന് ജമ്മുകശ്മീർ കോൺഗ്രസ് പ്രസിഡന്റ് ഗുലാം അഹമ്മദ് മിർ പറഞ്ഞു.
കഴിഞ്ഞ മൂന്ന് വർഷവും ക്ഷേത്രം സന്ദർശിക്കണമെന്ന ആഗ്രഹം അദ്ദേഹം പ്രകടിപ്പിച്ചിരുന്നു. എന്നാൽ, ജമ്മുവിലെ സാഹചര്യം മോശമായിരുന്നതിനാൽ ഞങ്ങൾ അദ്ദേഹത്തിന്റെ സന്ദർശനം വിലക്കുകയായിരുന്നു. എന്നാൽ, ഇപ്പോൾ സ്ഥിതി മെച്ചപ്പെട്ടിട്ടുണ്ട്. കത്രയിൽ നിന്ന് കാൽനടയായിട്ടായിരിക്കും രാഹുൽ ക്ഷേത്രത്തിലെത്തുകയെന്നും മിർ പറഞ്ഞു.
ആദ്യദിവസം അദ്ദേഹത്തിന് രാഷ്ട്രീയപരിപാടികളൊന്നുമില്ല. രണ്ടാം ദിവസം കത്രയിൽ നിന്ന് ജമ്മുവിൽ മടങ്ങിയെത്തിയതിന് ശേഷം പ്രാദേശിക രാഷ്ട്രീയനേതാക്കളുമായി അദ്ദേഹം കൂടിക്കാഴ്ച നടത്തും. അദ്ദേഹത്തെ സ്വീകരിക്കുന്നതിനായി ഞങ്ങൾ ചില പരിപാടികൾ ആസൂത്രണം ചെയ്തിട്ടുണ്ട്. പിന്നീട് ലഡാക്കിലേക്കും രാഹുൽ ഗാന്ധി പോവുമെന്ന് അഹമ്മദ് മിർ പറഞ്ഞു. കശ്മീരിന് പ്രത്യേകാധികാരം നൽകുന്ന ആർട്ടിക്കൾ 370 റദ്ദാക്കിയതിന് ശേഷം ഇത് രണ്ടാം തവണയാണ് രാഹുൽ ജമ്മുകശ്മീരിലെത്തുന്നത്. ആഗസ്റ്റ് ഒമ്പതിനും അദ്ദേഹം ജമ്മുകശ്മീർ സന്ദർശിച്ചിരുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.