ന്യൂഡൽഹി: കോവിഡ് മഹാമാരി ലോകം കീഴടക്കിയ ശേഷം നീണ്ട സമയത്തിനിടെ ഒരു രാജ്യവും എത്തിയിട്ടില്ലാത്ത റെക്കോഡും പിന്നിട്ട് ഇന്ത്യയിൽ കോവിഡ് അതിതീവ്രവ്യാപനം കുതിക്കുന്നു. 24 മണിക്കൂറിനിടെ ആദ്യമായി മൂന്നു ലക്ഷത്തിനു മുകളിലാണ് ബുധനാഴ്ച രേഖപ്പെടുത്തിയത്- 3,15,925 പേർ. ജനുവരി എട്ടിന് അമേരിക്കയിൽ മൂന്നുലക്ഷത്തിനു മുകളിൽ രോഗബാധ റിപ്പോർട്ട് ചെയ്യപ്പെട്ടിരുന്നുവെങ്കിലും ഇത്രയും എത്തിയിരുന്നില്ല. ഇന്ത്യയിൽ മരണസംഖ്യ 2,000 കടന്നു- 2,102 പേരാണ് ബുധനാഴ്ച മരണത്തിന് കീഴടങ്ങിയത്.
ഈ മാസാദ്യം അരലക്ഷത്തിനു മുകളിലായിരുന്നത് 20 ദിവസമെടുത്താണ് മൂന്നു ലക്ഷം തൊട്ടത്. ഒരു ലക്ഷത്തിൽനിന്ന് മൂന്നിരട്ടിയാകാൻ എടുത്തത് 17 ദിവസവും. യു.എസിലാകട്ടെ ഒരു ലക്ഷത്തിൽനിന്ന് മൂന്നുലക്ഷമാകാൻ മൂന്നു മാസമെടുത്തിരുന്നു.
മഹാരാഷ്ട്രയാണ് കണക്കുകളിൽ ഇപ്പോഴും ബഹുദൂരം മുന്നിൽ- 24 മണിക്കൂറിനിടെ 67,468 പുതിയ രോഗികൾ. ഉത്തർപ്രദേശ് (33,214), ഡൽഹി (24,638), കർണാടക (23,558), കേരളം (22,414) എന്നിവയാണ് തൊട്ടുപിറകിൽ. രാജസ്ഥാൻ, മധ്യപ്രദേശ്, ഗുജറാത്ത്, ആന്ധ്രപ്രദേശ്, ബിഹാർ, തമിഴ്നാട്, ബംഗാൾ, ഹരിയാന, ഝാർഖണ്ഡ്, ഒഡിഷ, തെലങ്കാന, ജമ്മു കശ്മീർ, ഗോവ എന്നിവിടങ്ങളിലും തീവ്രവ്യാപനം നിലനിൽക്കുകയാണ്.
മരണസംഖ്യയിലും മഹാരാഷ്ട്ര തന്നെ ഒന്നാമത്- 568 മരണം. ഇത്രയേറെ പേർ ഒരു ദിവസം സംസ്ഥാനത്ത് മരണത്തിന് കീഴടങ്ങുന്നതും ആദ്യം. ഡൽഹിയിൽ 249 പേരും ഛത്തീസ്ഗഢിൽ 193 പേരും മരിച്ചപ്പോൾ ഗുജറാത്ത് (125), കർണാടക (116) എന്നിവയിലും 100 കടന്നു. മധ്യപ്രദേശിൽ 75 പേരാണ് 24 മണിക്കൂറിനിടെ മരണത്തിന് കീഴടങ്ങിയത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.