അപകടത്തിൽ കാർ ശരിക്കും പിളർന്നോ? ഇതാണ്​ ആ സെൽറ്റോസിന്​ സംഭവിച്ചത്​

നാഗ്​പുർ: കഴിഞ്ഞിദവസം മധ്യപ്രദേശിലുണ്ടായ അപകടമാണ്​ സാമൂഹിക മാധ്യമങ്ങളിലെ ചൂടേറിയ ചർച്ച. ജൂൺ 11ന് ചിന്ദ്വാര-നാഗ്​പുർ ഹൈവേയിലുണ്ടായ അപകടത്തിൽ കിയ സെൽറ്റോസ്​ രണ്ടായി പിളർന്നതിൻെറ ചിത്രങ്ങൾ വ്യാപകമായി പ്രചരിച്ചിരുന്നു. വാഹനത്തിൽ അഞ്ചുപേരാണ്​ ഉണ്ടായിരുന്നത്​. ഇതിൽ മൂന്ന്​ പേർ മരിച്ചു. രണ്ടുപേർ ഗുരുതര പരിക്കുകളോടെ ചികിത്സയിലാണ്​.

കാർ രണ്ടായി വേർപെട്ടത്​ പല​​രെയും ഞെട്ടിച്ചിട്ടുണ്ട്​. ഇതിനെ കുറിച്ച്​ പലവിധ അഭ്യൂഹങ്ങളാണ്​ സാമൂഹിക മാധ്യമങ്ങളിൽ വന്നത്​. കാർ രണ്ട്​ ഭാഗങ്ങളായി തകരാൻ ഒരു വഴിയുമില്ലെന്നും യാത്രക്കാരെ രക്ഷപ്പെടുത്താൻ വേണ്ടി കട്ടറുകൾ ഉപയോഗിച്ചിരിക്കാം എന്നുമാണ്​ പലരും വാദിച്ചത്​. എന്നാൽ, വാഹനം വേർപിരിഞ്ഞത്​ അപകടത്തിൽ തന്നെയാണെന്ന്​ സൗൻസാർ പൊലീസ്​ ഇൻസ്​പെക്​ടർ ആർ.ആർ. ദുബെ വ്യക്​തമാക്കുന്നു.

'രണ്ട് വരി പാതയായ എൻ‌.എച്ച് 547ൽ കിയ സെൽറ്റോസ് അമിത വേഗതയിലായിരുന്നു സഞ്ചരിച്ചിരുന്നത്​. ഇതിനിടയിൽ ഇടറോഡിൽനിന്ന്​ ബൈക്ക്​ പെ​ട്ടെന്ന്​ മുന്നിലേക്ക്​ വന്നു. ബൈക്കിൽ ഇടിക്കുന്നത് ഒഴിവാക്കാൻ ഡ്രൈവർ റോഡിൽനിന്ന് വാഹനം പുറത്തേക്കെടുക്കുകയും നിമിഷനേരം കൊണ്ട്​ തിരിച്ചുവരികയും ചെയ്​തു. ഇതിനിടയിൽ ടയറിൽ ചെളി നിറഞ്ഞിരുന്നു.

തിരിച്ച്​ റോഡിലേക്ക്​ തന്നെ വന്ന വാഹനം നിയന്ത്രണം വിട്ട്​ പാലത്തിൻെറ ഭിത്തിയുടെ മൂലയിൽ പോയി ഇടിക്കുകയായിരുന്നു. ഇടിയുടെ ആഘാതത്തിൽ തറഭാഗം പിളർന്നു. പാലത്തിൻെറ കൂർത്തഭാഗം കാരണം മേൽക്കൂരയിൽ വെൽഡ്​ ചെയ്​ത ഭാഗം ചെത്തിപ്പോയി. ഇതോടെ വാഹനം രണ്ട്​ ഭാഗമായി വേർപ്പെടുകയായിരുന്നു' -ആർ.ആർ. ദുബെ പറഞ്ഞു.

യാത്രക്കാരെ രക്ഷിക്കാനായി പൊലീസിന്​ കട്ടർ ഉപയോഗിക്കേണ്ടി വന്നിട്ടില്ല. വാഹനത്തിൻെറ പിൻസീറ്റിൽ ഇരുന്ന മൂന്നുപേരാണ്​ മരിച്ചത്​. മുന്നിലുള്ളവർ സീറ്റ്​ ബെൽറ്റ്​ ധരിച്ചതിനാലും എയർ ബാഗ്​ ഉള്ളതിനാലും പരിക്കുകളോടെ രക്ഷപ്പെട്ടു.

പിന്നിലെ സീറ്റിനടിയിൽ ഇന്ധന ടാങ്ക്​ ഉള്ളതിനാൽ ആ ഭാഗത്ത്​ ആരും കട്ടർ ഉപയോഗിക്കാറില്ല. ഇനി അഥവാ രക്ഷിക്കണമെന്നുണ്ടെങ്കിൽ മുകൾ ഭാഗമാണ്​​ പൊതുവെ പൊളിക്കാറുള്ളത്​​. വാഹനം ഒരൊറ്റ തവണ മാത്രമാണ്​ പാലത്തിൽ ഇടിച്ചിട്ടുള്ളതെന്നും പൊലീസ്​ ഇൻസ്​പെക്​ടർ വ്യക്​തമാക്കി.