പുത്തൻ ജലയാനങ്ങളുടെ കാഴ്ചകളൊരുക്കി ബോട്ട്​ഷോ

ദുബൈ: സമുദ്ര ഗതാഗത രംഗത്തെ ആഡംബരങ്ങളുടെ അവസാന വാക്കായ സൂപ്പർ ജലയാനങ്ങളുടെ പ്രദർശനമൊരുക്കി ദുബൈ അന്താരാഷ്ട്ര ബോട്ട്​ഷോ പുരോഗമിക്കുന്നു. മിഡിൽ ഈസ്റ്റിലെ ഏറ്റവും വലുതും വ്യവസ്ഥാപിതവുമായ പ്രദർശനം ദുബൈ വേൾഡ്​ ട്രേഡ്​ സെന്‍ററാണ്​ സംഘടിപ്പിക്കുന്നത്​. ദുബൈ ഹാർബറിൽ നടക്കുന്ന 31ാമത്​ ബോട്ട്​ ഷോയുടെ ഉദ്​ഘാടനം ദുബൈ രണ്ടാം ഉപഭരണാധികാരി ശൈഖ്​ അഹമ്മദ് ബിൻ മുഹമ്മദ് ബിൻ റാശിദ് ആൽ മക്തൂമാണ്​ നിർവഹിച്ചത്​. ഇത്തവണ പ്രദർശനത്തിൽ 60 രാജ്യങ്ങളിൽ നിന്നുള്ള 1,000-ത്തിലധികം പ്രദർശന ബ്രാൻഡുകൾ എത്തിയിട്ടുണ്ട്​. ഇതിൽ 200ലധികം അത്യാധുനിക യോട്ടുകളും വാട്ടർക്രാഫ്റ്റുകളും ഉൾപ്പെടും.

ബോട്ട്​ഷോയുടെ വിജയത്തെ അഭിനന്ദിച്ച ശൈഖ്​ അഹമ്മദ്​, ഒരു മികച്ച ആഗോള ടൂറിസം കേന്ദ്രമായും സമുദ്ര ടൂറിസത്തിനുള്ള മുൻനിര അന്താരാഷ്ട്ര കേന്ദ്രമായും ദുബൈയെ മാറ്റാനുള്ള കാഴ്ചപ്പാടിനെ വിജയം പ്രതിഫലിപ്പിക്കുന്നുവെന്ന്​ പറഞ്ഞു. സമുദ്ര ഗതാഗത മേഖലയെ സഹായിക്കുന്നതിനും സന്ദർശകർക്ക് സുഗമമായ അനുഭവം ഉറപ്പാക്കുന്നതിനും ആവശ്യമായ മുഴുവൻ സേവനങ്ങളും സൗകര്യങ്ങളും ഉൾക്കൊള്ളുന്ന അത്യാധുനിക തുറമുഖങ്ങളും മറീനകളും ദുബൈ ഒരുക്കിയിട്ടുണ്ടെന്നും അദ്ദേഹം വ്യക്​തമാക്കി. നിർമ്മാതാക്കൾ, വ്യാപാരികൾ, ബോട്ട്​ ഉടമകൾ എന്നിവരുൾപ്പെടെ സമുദ്ര ഗതഗാത വ്യവസായ മേഖലയിലെ എല്ലാവർക്കും ദുബൈ പ്രധാന ലക്ഷ്യസ്ഥാനമായി മാറിയിട്ടുണ്ടെന്നും അദ്ദേഹം കൂട്ടിച്ചേർത്തു.

1992ൽ​ ആരംഭിച്ച ബോട്ട്​ഷോ മൂന്ന്​ പതിറ്റാണ്ട്​ പിന്നിടുമ്പോൾ വലുപ്പത്തിലും പങ്കാളിത്തത്തിലും ലോകത്തിലെ ഏറ്റവും വലിയ ഈ മേഖലയിലെ പ്രദർശനങ്ങളി​ലൊന്നായി മാറിയിട്ടുണ്ട്​. ഫെബ്രുവരി 23 വരെയാണ്​ പ്രദർശനം ഒരുക്കിയിട്ടുള്ളത്​. കഴിഞ്ഞ ദിവസം യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം മേള സന്ദർശിച്ചിരുന്നു.

ബോട്ട്​ഷോക്ക്​ മുന്നോടിയായി ആഡംബര ബോട്ട് ഉടമകള്‍ക്ക് ദുബൈ ഗോള്‍ഡന്‍ വിസ പ്രഖ്യാപിച്ചിരുന്നു. ജനറൽ ഡയറക്​​ട​​റേറ്റ്​ ഓഫ്​ റസിഡന്‍റ്​സി ആൻഡ്​ ഫോറിനേഴ്​സ്​ അഫേഴ്​സ്​ (ജി.ഡി.ആര്‍.എഫ്.എ) അധികൃതരാണ് ഇക്കാര്യമറിയിച്ചത്. കഴിഞ്ഞ ഡിസംബറില്‍ അബൂദബിയിലെ ആഡംബര ബോട്ട് ഉടമകള്‍ക്ക് ഗോള്‍ഡന്‍ വിസ പ്രഖ്യാപിച്ചിരുന്നു.