ഒ.​െഎ.സി.സി, നെസ്​റ്റോ ‘കളർ ഫെസ്​റ്റ്​’ ചിത്രരചന മത്സരം ഇന്ന്

റിയാദ്: ഒ.​െഎ.സി.സി കോഴിക്കോട്​ ജില്ലാകമ്മിറ്റിയും നെസ്​റ്റോ ഹൈപർമാർക്കറ്റും സംയുക്തമായി സംഘടിപ്പിക്കുന്ന ‘കളർ ഫെസ്​റ്റ്​’ ചിത്രരചന മത്സരം വെള്ളിയാഴ്​ച അസീസിയ ​ട്രെയിൻ (ഗാർഡനിയ) മാളിലെ നെസ്​റ്റോ ഹൈപർമാർക്കറ്റ്​ ഹാളിൽ നടക്കും. റിയാദിലെ വിവിധ ഇന്ത്യൻ സ്​കൂളുകളിൽ നിന്നുള്ള കുട്ടികൾക്കായി തുടർച്ചയായി നാലാം വർഷത്തിലാണ്​ ചിത്രരചന, പെയിൻറിങ്​ മത്സരം സംഘടിപ്പിക്കുന്നതെന്ന്​ ഭാരവാഹികൾ വാർത്താസമ്മേളനത്തിൽ അറിയിച്ചു. ഉച്ചക്ക്​ രണ്ട്​ മുതൽ രജിസ്ട്രേഷൻ ആരംഭിക്കും. വൈകീട്ട്​ നാലിന്​ മത്സരങ്ങൾ തുടങ്ങും.

പ്രധാനമായും നാല് വിഭാഗങ്ങളിലാണ് മത്സരം. ക്ലാസ്​ അടിസ്ഥാനത്തിൽ എൽ.കെ.ജി മുതൽ ഒന്ന്​ വരെ എ ഗ്രൂപ്​, രണ്ട് മുതൽ നാല് വരെ ബി ഗ്രൂപ്​, അഞ്ച് മുതൽ എട്ട് വരെ സി ഗ്രൂപ്​, ഒമ്പത് മുതൽ 12ാം ക്ലാസ് വരെ ഡി ഗ്രൂപ്​ എന്നിങ്ങനെ തിരിച്ച്​ മത്സരങ്ങൾ നടത്തും. നാല് ഗ്രൂപ്പിലെയും ഒന്നാം സ്ഥാനക്കാർക്ക്​ സ്വർണ നാണയമാണ്​ സമ്മാനം. രണ്ടും മൂന്നും സ്ഥാനക്കാർക്കും ആകർഷകമായ സമ്മാനങ്ങൾ നൽകും. നാല്​ വിഭാഗങ്ങളിലും കൂടി മികവ്​ പുലർത്തുന്ന ഒരു ആൺകുട്ടിക്കും പെൺകുട്ടിക്കും റിയാദിൽ നിന്നും ഇന്ത്യയിലേക്കും തിരികെയുമുള്ള എയർ ഇന്ത്യ വിമാന ടിക്കറ്റുകൾ സമ്മാനമായി നൽകും. കൂടാതെ മത്സരത്തിൽ പങ്കെടുക്കുന്ന എല്ലാ കുട്ടികൾക്കും സർട്ടിഫിക്കറ്റുകൾ വിതരണം ചെയ്യും. രജിസ്ട്രേഷനുള്ള അപേക്ഷ ഫോറങ്ങൾ അതാത് സ്കൂളുകളിൽ ലഭ്യക്കും. www.oicc-colorfest.ml/registration എന്ന ലിങ്കിലൂടെ ഓൺലൈനായും രജിസ്​റ്റർ ചെയ്യാം.

കളർ ഫെസ്​റ്റ്​ പരിപാടിയിലൂടെ ലഭിക്കുന്ന വരുമാനം ജില്ലാകമ്മറ്റി പാവപ്പെട്ടവർക്ക്​ വീടുകൾ നിർമിച്ചുനൽകുന്ന ‘ഇന്ദിരാജി സ്നേഹ ഭവന’ പദ്ധതിക്കുവേണ്ടി വിനിയോഗിക്കും. റിയാദിലെ 12ഒാളം ഇന്ത്യൻ സ്കൂളുകളിലെ വിദ്യാർഥികൾ പങ്കെടുക്കും. കഴിഞ്ഞ വർഷം 10,000ഒാളം വിദ്യാർഥികൾ രജിസ്​റ്റർ ചെയ്​തു. ഇത്തവണ അതിൽ കൂടുതലുണ്ടാകുമെന്ന്​ പ്രതീക്ഷിക്കുന്നു. 18 വയസിന് മുകളിലുള്ളവർക്കായി കാരിക്കേച്ച മത്സരവും ഇതോട്​ അനുബന്ധിച്ച്​ സംഘടിപ്പിക്കുമെന്നും ഭാരവാഹികൾ പറഞ്ഞു. വിജയിക്ക് കാഷ് പ്രൈസ് സമ്മാനമായി നൽകും. വാർത്താസമ്മേളനത്തിൽ സംഘാടക സമിതി ചെയർമാൻ മോഹൻ ദാസ് വടകര, ആക്ടിങ്​ പ്രസിഡൻറ്​ അബ്​ദുൽ കരീം കൊടുവള്ളി, മീഡിയ കൺവീനർ അശ്റഫ് മേച്ചിരി, സഫാദ് അത്തോളി, എം.ടി അർഷാദ്, റഫീഖ് എരഞ്ഞിമാവ് എന്നിവർ പങ്കെടുത്തു.