ക്രൊയേഷ്യ ‘ബി’ ടീമിനെതിരെ ഗോൾ നേടിയ ഖത്തർ താരങ്ങളുടെ ആഘോഷം
ദോഹ: ഖത്തർ ഫുട്ബാൾ സീസണിന് സെപ്റ്റംബറിൽ കിക്കോഫ് കുറിക്കുമെന്ന് ദേശീയ ഫുട്ബാൾ അസോസിയേഷൻ കോമ്പിറ്റീഷൻ കമ്മിറ്റി ചെയർമാൻ ഹമദ് അൽ മന്നാനി. പുതിയ സീസണിന് മുന്നോടിയായി ക്ലബുകളുടെ പരിശീലന ക്യാമ്പുകൾക്ക് വ്യാഴാഴ്ച തുടക്കംകുറിച്ചു. കോവിഡ് മാനദണ്ഡങ്ങൾ പാലിച്ചുകൊണ്ട് ക്ലബുകൾക്ക് വിദേശ പരിശീലനവും നടത്താമെന്ന് അദ്ദേഹം അറിയിച്ചു.
2022 ഫിഫ ലോകകപ്പിന് മുന്നോടിയായി രാജ്യം വേദിയാവുന്ന ലീഗ് സീസൺ എന്ന പ്രത്യേകത കൂടി ഈ 2021-22 സീസണിനുണ്ട്. അടുത്ത ഏപ്രിലിലെ അമിർ കപ്പ് ചാമ്പ്യൻഷിപ്പോടെ സീസൺ അവസാനിക്കും. ലോകകപ്പിന് മുന്നോടിയായി ക്ലബുകൾക്ക് കളിക്കാരെ വിട്ടുനൽകേണ്ടിവരുമെന്നതിനാലാണ് സീസൺ ഏപ്രിലിൽ അവസാനിപ്പിക്കുന്നത്. 12 ക്ലബുകൾ മാറ്റുരക്കുന്ന ഒന്നാം ഡിവിഷൻ മത്സരമായ ഖത്തർ സ്റ്റാർസ് ലീഗിൽ സ്പാനിഷ് ഇതിഹാസം സാവി പരിശീലിപ്പിക്കുന്ന അൽ സദ്ദാണ് നിലവിലെ ചാമ്പ്യന്മാർ.
ക്രൊയേഷ്യ 'ബി' ടീമിനെതിരെ ഖത്തറിന് ജയം
ദോഹ: അമേരിക്കയിൽ നടക്കുന്ന കോൺകാഫ് ഗോൾഡ്കപ്പ് ഫുട്ബാളിനൊരുങ്ങുന്ന ഖത്തറിന് സന്നാഹ മത്സരത്തിൽ തകർപ്പൻ ജയം. ക്രൊയേഷ്യയിലെ പുലയിൽ നടന്ന മത്സരത്തിൽ ദേശീയ 'ബി' ടീമിനെതിരെ 3-1നായിരുന്നു ജയം. ജൂൈല 10 മുതൽ അമേരിക്കയിൽ ആരംഭിക്കുന്ന കോൺകകാഫ് ഗോൾഡ് കപ്പിനുള്ള യാത്രാമധ്യേയാണ് ഖത്തർ ക്രൊയേഷ്യയിലെത്തിയത്. അടുത്ത ലോകകപ്പിനൊരുങ്ങുന്ന ടീം എന്ന നിലയിൽ പ്രത്യേക ക്ഷണിതാക്കളായാണ് ഖത്തർ ഗോൾഡ് കപ്പിൽ മത്സരിക്കുന്നത്. അൽമോസ് അലി, അബ്ദുൽ അസിസ് ഹാതിം ഉൾപ്പെടെ പ്രധാന താരങ്ങളുമായാണ് ഖത്തർ ക്രൊയേഷ്യ ബി ടീമിനെ നേരിട്ടത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.