നവരാത്രി: സംഘടനകൾ ഒരുക്കം തുടങ്ങി

കുരുന്നുകൾക്ക്​ ആദ്യാക്ഷരം കുറിക്കാനെത്തുന്നത്​ പ്രമുഖർ 
മനാമ: സംഘടനകളുടെ നേതൃത്വത്തിൽ ബഹ്​റൈനിൽ നടക്കുന്ന നവരാത്രി ആഘോഷങ്ങൾക്കും വിദ്യാരംഭ ചടങ്ങിനുമായി എത്തുന്നത്​ വിവിധ രംഗങ്ങളിലെ  പ്രശസ്​തർ. ആഘോഷങ്ങൾക്കുള്ള ഒരുക്കങ്ങൾ സംഘടനകൾ തുടങ്ങികഴിഞ്ഞിട്ടുണ്ട്​.  സെപ്​റ്റംബർ 30നാണ്​ വിദ്യാരംഭം.പല സംഘടനകളും ഒരുമാസം മു​േമ്പ രജിസ്​ട്രേഷൻ ആരംഭിച്ചിട്ടുണ്ട്​.
  കേരളീയ സമാജത്തിൽ പ്രമുഖ കഥാകൃത്ത്​ എം. മുകുന്ദനാണ്​ എഴുത്തിനിരുത്ത് ചടങ്ങുകള്‍ക്ക് നേതൃത്വം നല്‍കുക. സമാജത്തിൽ കഴിഞ്ഞ 16 വര്‍ഷമായി വിദ്യാരംഭ ആഘോഷം നടക്കുന്നുണ്ട്​.  ഇത്തവണ ആദ്യാക്ഷരം കുറിക്കുന്നതിനുള്ള രജിസ്ട്രേഷന്‍ ആരംഭിച്ചിട്ടുണ്ട്. സമാജം അംഗങ്ങൾ അല്ലാത്തവർക്കും പങ്കെടുക്കാം. ആദ്യം രജിസ്​റ്റര്‍ ചെയ്യുന്ന 100 പേര്‍ക്കാണ് അവസരം ലഭിക്കുക. സമാജം ഓഫിസില്‍ നേരി​െട്ടത്തി രജിസ്​ട്രേഷൻ നടത്തണം. കൂടുതൽ വിവരങ്ങൾക്കും  രജിസ്ട്രേഷനും  33988231, 17251878  എന്നീ നമ്പറുകളിൽ വിളിക്കാം. 
ശ്രീനാരായണ കൾചറൽ സൊസൈറ്റി കുറെ വർഷങ്ങളായി നവരാത്രി ആഘോഷങ്ങൾ നടത്തുന്നുണ്ട്​. ഇൗ വർഷം കാവാലം ശ്രീകുമാറാണ്​ വിദ്യാരംഭം കുറിക്കാൻ എത്തുന്നത്​. ഒ.എൻ.വി, മധുസൂദനൻ നായർ, ശ്രീകുമാരൻ തമ്പി തുടങ്ങിയവരാണ്​ പോയ വർഷങ്ങളിൽ ഇവിടെ വിദ്യാരംഭം കുറിച്ചിട്ടുള്ളത്​.
വിപുലമായ പരിപാടികളോടെയാണ്​ കേരള സോഷ്യൽ ആൻറ്​​ കൾചറൽ അസോസിയേഷൻ (എൻ.എസ്​.എസ്​) നവരാത്രി ആഘോഷങ്ങൾ സംഘടിപ്പിക്കുന്നത്​. ഗായകൻ ജി. വേണുഗോപാലാണ്​ ഇത്തവണ മുഖ്യാതിഥി. അദ്ദേഹം കുരുന്നുകൾക്ക്​ വിദ്യാരംഭം കുറിക്കും. 
ഗുരുദേവ സോഷ്യൽ സൊസൈറ്റിയിൽ മജീഷ്യൻ ഗോപിനാഥ്​ മുതുകാടാണ്​ വിദ്യാരംഭം കുറിക്കുന്നത്​. പത്ത്​ ദിവസം നീണ്ട ആഘോഷങ്ങളിൽ വിവിധ പരിപാടികൾ നടക്കും. അറാദ്​ അയ്യപ്പ ക്ഷേത്രത്തിൽ നവരാത്രിയുടെ ഭാഗമായി പ്രത്യേക പൂജകളുണ്ടാകും. മാളികപ്പുറം മേൽശാന്തി മനോജ്​ എ​മ്പ്രാന്തിരിയാണ്​ ഇവിടെ വിദ്യാരംഭം കുറിക്കാൻ എത്തുന്നത്​. കാനൂ അയ്യപ്പ ക്ഷേത്രത്തിലും നവരാത്രി പൂജകൾ നടക്കും. ക്ഷേത്രം പൂജാരി നാരായണൻ നമ്പൂതിരിയാണ്​ വിദ്യാരംഭത്തിന്​ നേതൃത്വം നൽകുന്നത്​. സംഗീതജ്​ഞൻ വിധ്യാദരൻ മാഷ്​, മുരുകൻ കാട്ടാക്കട തുടങ്ങിയവർ ഇവിടെ മുൻവർഷങ്ങളിൽ എത്തിയിരുന്നു.
ബഹ്​റൈനിൽ വിദ്യാരംഭം കുറിക്കുന്നവരുടെ എണ്ണം വർഷ​ംതോറും കൂടുകയാണ്​​. സൗദിയിൽനിന്നും വിദ്യാരംഭത്തിനായി  ഇവിടേക്ക്​ പ്രവാസികൾ എത്താറുണ്ട്​.