വാഷിങ്ടൺ: അന്താരാഷ്ട്ര വിപണിയിൽ വീണ്ടും ക്രൂഡോയിൽ വില കുറഞ്ഞു. ആവശ്യകതയിൽ കുറവുണ്ടാകുമെന്ന റിപ്പോർട്ടുകളാണ് ക്രൂഡോയിൽ വിലയെ സ്വാധീനിക്കുന്നത്. ഷാങ്ഹായിയിൽ പ്രഖ്യാപിച്ച ലോക്ഡൗണും യു.എസ് പലിശനിരക്കുകൾ ഉയർത്തുന്നതിനെ തുടർന്ന് ആഗോള സാമ്പത്തിക വളർച്ചയിലുണ്ടാവുന്ന ഇടിവും ക്രൂഡോയിൽ ആവശ്യകതയിൽ കുറവുണ്ടാക്കുമെന്നാണ് റിപ്പോർട്ട്. ഇതേത്തുടർന്നാണ് വില ഇടിഞ്ഞത്.
ഇന്ത്യ ഉൾപ്പടെയുള്ള രാജ്യങ്ങൾ ഉപയോഗിക്കുന്ന ബ്രെന്റ് ക്രൂഡിന്റെ വിലയിൽ 3.03 ഡോളറിന്റെ ഇടിവാണ് ഉണ്ടായത്. ബാരലിന് 103.6 ഡോളറാണ് ബ്രെന്റ് ക്രൂഡിന്റെ വില. വെസ്റ്റ് ടെക്സാസ് ഇന്റർമീഡിയേറ്റ് ക്രൂഡിന്റെ വില 2.94 ഡോളർ ഇടിഞ്ഞ് 99.14 ഡോളറിലെത്തി.
ബ്രെന്റ് ക്രൂഡിന്റെ ഭാവി വിലയിൽ 1.90 ഡോളറിന്റെ ഇടിവാണ് ഉണ്ടായത്. വെസ്റ്റ് ടെക്സാസ് ഇന്റർമീഡിയേറ്റ് ക്രൂഡിന്റെ ഭാവി വിലയും ഇടിഞ്ഞു. ആഗോള വിപണിയിൽ എണ്ണവിലയിൽ കഴിഞ്ഞയാഴ്ച അഞ്ച് ശതമാനം ഇടിവാണ് ഉണ്ടായത്. അതേസമയം, വില കുറയുമെങ്കിലും ബാരലിന് 90 ഡോളറിൽ താഴെ ക്രൂഡോയിൽ നിരക്ക് എത്തില്ലെന്നാണ് സൂചന. റഷ്യൻ എണ്ണക്ക് യുറോപ്യൻ യൂണിയൻ നിരോധനമേർപ്പെടുത്തുന്നതാണ് വില കുറയാതിരിക്കാനുള്ള കാരണം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.