മുംബൈ: റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയുടെ മകൻ ആകാശും വജ്രവ്യാപാരി റസൽ മേത്തയുടെ മകൾ ശ്ലോക മേത്തയും തമ്മിലുള്ള വിവാഹം ഉറപ്പിച്ചു. വിവാഹ നിശ്ചയ ചടങ്ങുകൾ ഗോവയിൽ വെച്ചാണ് നടന്നത്. ഈ വർഷം ആദ്യമാണ് ഇരുവരുടെയും വിവാഹ നിശ്ചയം നടത്താൻ തീരുമാനിച്ചത്. വിവാഹ നിശ്ചയവും കല്യാണവും സംബന്ധിച്ച വിവരങ്ങൾ അംബാനി കുടുംബം ഔദ്യോഗികമായി പുറത്തുവിട്ടില്ല. എന്നാൽ, വിവാഹ നിശ്ചയ ചിത്രങ്ങൾ സാമൂഹിക മാധ്യമങ്ങൾ പുറത്തുവിട്ടു.
മുകേഷ് അംബാനിയുടെയും നിത അംബാനിയുടെയും മൂത്ത പുത്രനാണ് 25കാരനായ ആകാശ്. ലോകത്തിലെ തന്നെ വലിയ വജ്രവ്യാപാര സ്ഥാപനങ്ങളിലൊന്നായ റോസി ബ്ലൂ ഡയമണ്ട്സിന്‍റെ ഉടമ റസൽ മേത്തയുടെയും മോനയുടെയും ഇളയ മകളാണ് ശ്ലോക. മുംബൈ ദീരുഭായ് അംബാനി ഇന്‍റർനാഷണൽ സ്കൂളിൽ ഒരുമിച്ച് പഠിച്ച ആകാശും ശ്ലോക‍യും അടുത്ത സുഹൃത്തുകളാണ്.
ലണ്ടൻ സ്കൂൾ ഒാഫ് ഇക്കണോമിക്സിലും പ്രിൻസ്റ്റൻ സർവകലാശാലയിലും ആണ് ശ്ലോക മേത്ത പഠനം പൂർത്തിയാക്കിയത്. നിലവിൽ കുടുംബ സ്ഥാപനത്തിൽ ഡയറക്ടറും മുംബൈ ആസ്ഥാനമായി പ്രവർത്തിക്കുന്ന കണക്ട് ഫോർ എന്ന സംഘടനയുടെ സഹ സ്ഥാപകയുമാണ് ശ്ലോക.
ആനന്ദ്, ഇഷ എന്നിവരാണ് മുകേഷ്^നിത ദമ്പതികളുടെ മറ്റ് മക്കൾ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.