പ്രണയത്തിലും യുദ്ധത്തിലും എന്തുമാകാമെന്നാണ് ചൊല്ല്. ഇത് ഗൗരവത്തിലെടുത്തിട്ടാണെന്ന് തോന്നുന്നു, കാമുകിക്ക് വേണ്ടി പരീക്ഷ എഴുതാൻ പോയി പുലിവാലു പിടിച്ചിരിക്കുകയാണ് കാമുകൻ. അതും പെൺവേഷം കെട്ടി. ആഫ്രിക്കയിലെ സെനഗലിലാണ് സംഭവം.
22കാരനായ ഖാദിം എംബാപ്പെയാണ് 19കാരിയായ കാമുകിക്ക് വേണ്ടി ആൾമാറാട്ടത്തിന് തയാറായത്. തോൽക്കുമോയെന്ന ഭയം കാരണം പെൺകുട്ടി പരീക്ഷയെഴുതാൻ തയാറായില്ല. ഇതോടെ, വേഷം മാറി പരീക്ഷയെഴുതാൻ ഖാദിം എംബാപ്പെ തീരുമാനിച്ചു. ഗാസ്റ്റൺ ബർജർ സർവകലാശാല വിദ്യാർഥിയാണ് എംബാപ്പെ.
മൂന്ന് പരീക്ഷകൾ ആൾമാറാട്ടം നടത്തി ഇയാൾ എഴുതിയെങ്കിലും നാലാം ദിവസം സംശയം തോന്നിയ ഇൻവിജിലേറ്റർ എംബാപ്പെയെ പിടികൂടി. തുടർന്ന് പൊലീസ് എത്തി അറസ്റ്റ് ചെയ്തു.
കാമുകിയോടുള്ള പ്രണയം കാരണമാണ് താൻ ആൾമാറാട്ടത്തിന് തയാറായതെന്ന് ഇയാൾ പൊലീസിനോട് പറഞ്ഞു. ഇരുവർക്കുമെതിരെ പൊലീസ് കേസെടുത്തിട്ടുണ്ട്. അഞ്ച് വർഷത്തേക്ക് പരീക്ഷ വിലക്കും അഞ്ച് വർഷം വരെ തടവും ലഭിക്കാവുന്ന കുറ്റമാണ് ഇവർ ചെയ്തതെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.