വിഴിഞ്ഞത്തിനൊപ്പം

മാധ്യമം ആഴ്​ചപ്പതിപ്പ്​ തുടക്കം മുതലേ വിഴിഞ്ഞം ജനത​ക്കൊപ്പമാണ്​ നിലകൊണ്ടത്​. പഴയ ലക്കങ്ങൾ വെറുതെ മറിച്ചുനോക്കിയാൽതന്നെ അറിയാം. വിഴിഞ്ഞം പദ്ധതി വലിയ ദുരന്തത്തിലേക്കും അപകടത്തിലേക്കുമാണ്​ നമ്മളെ കൂട്ടിക്കൊണ്ടുപോകുന്നത്​ എന്ന്​ വ്യക്തമാക്കുന്ന നിരവധി കവർ സ്​റ്റോറികളും ലേഖനങ്ങളും പ്രസിദ്ധീകരിച്ചത്​ അതിൽ കാണാം. കടലും തീരവും നശിക്കുന്നതിനെപ്പറ്റിയും ഉപജീവനമില്ലാതാകുന്നതിനെപ്പറ്റിയും ജീവിതവും ആവാസവ്യവസ്​ഥ (കടലിലെയും കരയിലെയും) തകരുന്നതിനെപ്പറ്റിയും നമ്മൾ പലവിധ മുന്നറിയിപ്പുകൾ നൽകിയിരുന്നു. ഇപ്പോൾ ആ കഥ ആവർത്തിക്കേണ്ടതില്ല. ഇനിയും സഹിക്കണമെന്ന്​ വിഴിഞ്ഞംകാരോട്​ പറയരുത്​. ചോരയിൽ മുക്കി ഒരു ജനതയെ അടിച്ചമർത്താമെന്നും കരുതരുത്​.

ലളിതവും സുവ്യക്തവുമാണ്​ നിലപാട്​​:

കടലും കരയും ജീവിതവും ആ ജനതക്ക്​

തിരിച്ചു നൽകുക. അതുമാത്രമാണ്​ നീതി.

അതുമാത്രമാണ്​ ശരി.