കാൻസറേ ബാവാക്കയോട് കളിക്കല്ലേ! അഷ്റഫി​െൻറ തിരിച്ചുവരവ് സൂപ്പർ ആഘോഷമാക്കി പ്രിയപ്പെട്ടവർ

മലപ്പുറം: ഫുട്ബാൾ സംഘാടകനായും ഫോട്ടോഗ്രാഫറായും അഭിനേതാവായും തിളങ്ങിനിൽക്കവെ രോഗത്തെത്തുടർന്ന് പെട്ടെന്ന് രംഗംവിട്ട സൂപ്പർ അഷ്റഫി​െൻറ തിരിച്ചുവരവ് ആഘോഷിച്ച് കലാ-കായികലോകവും പ്രിയപ്പെട്ടവരും. ഒരു വർഷത്തെ ചികിത്സയെത്തുടർന്ന് അർബുദം ഭേദമമായ വിവരം 'കെ.എൽ 10 സൂപ്പർ സ്​റ്റാർ ഈസ് ബാക്ക്' എന്ന തലക്കെട്ടിൽ മാധ്യമം വാരാദ്യപ്പതിപ്പിൽ പ്രസിദ്ധീകരിച്ച കവർ സ്​റ്റോറിയിലാണ് അഷ്റഫ് അറിയിച്ചിരിക്കുന്നത്. ഇതറിഞ്ഞത്​ മുതൽ അന്താരാഷ്​ട്ര ഫുട്ബാൾ കളിക്കാർ, ചലച്ചിത്ര രംഗത്തെ പ്രമുഖർ തുടങ്ങി നാട്ടിലും വിദേശത്തുമുള്ള സാധാരണക്കാർ വരെ വിളിച്ചുകൊണ്ടിരിക്കുകയാണെന്ന് ഇദ്ദേഹം പറയുന്നു.

ഫുട്ബാൾ താരങ്ങളായ ഐ.എം വിജയൻ, യു. ഷറഫലി, കുരികേശ് മാത്യു, ഹബീബ് റഹ്​മാൻ, ആസിഫ് സഹീർ, സംവിധായകൻ സക്കരിയ ഉൾപ്പെടെയുള്ളവർ സന്തോഷത്തിൽ കൂട്ടുചേർന്നു. വാരാദ്യ മാധ്യമത്തിൽ കെ.പി.എം റിയാസ് എഴുതിയ അഷ്റഫ് എന്ന പ്രിയപ്പെട്ടവരുടെ ബാവാക്കയുടെ ജീവിതകഥ പറയുന്ന കവർ സ്​റ്റോറി സമൂഹ മാധ്യമങ്ങളിൽ ഫുട്ബാൾ മേഖലയിലെ നിരവധിപേർ പങ്കുവെച്ചിട്ടുണ്ട്.

അസുഖം ഭേദമായിട്ടും വീട്ടിൽ തുടരുന്ന തനിക്ക് മുന്നോട്ടുള്ള പ്രയാണത്തിൽ ഏറെ ഊർജം തരുന്നുണ്ട് ഇതെന്നും ചികിത്സിക്കുന്ന ഡോക്ടറാണ് കൂട്ടത്തിൽ ഏറ്റവും സന്തോഷം പ്രകടിപ്പിച്ചതെന്നും അഷ്​റഫ് പറഞ്ഞു. കേരളത്തിലെ മുൻനിര ഫുട്ബാൾ ക്ലബായ സൂപ്പർ സ്​റ്റുഡിയോയുടെ സ്ഥാപകനാണ് ഇദ്ദേഹം.