ഛേത്രിക്ക് ഹാട്രിക്; ഐ.എസ്.എല്ലിൽ ബംഗ്ലൂരുവിനോട് തോറ്റ് ബ്ലാസ്റ്റേഴ്സ്

ബംഗളൂരു: കണ്​ഠീരവയിൽ ഒരു ജയം എന്ന മോഹം ബാക്കി. കിട്ടിയ അവസരങ്ങളിൽ ഒന്നാന്തരം ഫിനിഷിങ്​ നടത്തി ആതിഥേയർ കളിപിടിച്ചപ്പോൾ മുഴുവൻ സമയവും പൊരുതിക്കളിച്ചിട്ടും കേരള ബ്ലാസ്​റ്റേഴ്​സിന്​ തോൽവി. ഹാട്രിക്​ നേടിയ സുനിൽ ഛേത്രിയു​ടെ മികവിൽ 4-2 നായിരുന്നു ബംഗളൂരുവിന്‍റെ ജയം. ഇതോടെ 23 പോയന്‍റുമായി ബംഗളൂരു പോയന്‍റ്​ പട്ടികയിൽ ഒന്നാം സ്ഥാനത്ത്​ തിരിച്ചെത്തി. ​

എട്ടാം മിനിറ്റിൽ ബംഗളൂരു അക്കൗണ്ട്​ തുറന്നു. വലതുവിങ്ങിൽ പന്തുസ്വീകരിച്ച്​ മുന്നേറിയ റയാൻ വില്യംസ്​ നൽകിയ ക്രോസിൽ സന്ദീപ്​ സിങ്ങിനെ മറികടന്ന്​ ഛേത്രി ഉതിർത്ത ഉഗ്രൻ ഹെഡർ പോസ്റ്റിന്‍റെ വലതുകോണിൽ വിശ്രമിച്ചു (1-0). 25 ാം മിനിറ്റിൽ സമനിലക്കുള്ള അവസരം ബ്ലാസ്​റ്റേഴ്​സ്​ കളഞ്ഞുകുളിച്ചു. മധ്യനിരയിൽനിന്ന്​ ലഭിച്ച പന്തുമായി വലതുവിങ്ങിലൂടെ നീങ്ങിയ ഫ്രെഡ്ഡി ബോക്സിലേക്ക്​ നൽകിയ പന്ത്​ ജിമനസ്​ പോസ്റ്റിലേക്ക്​ വഴിതിരിച്ചുവിടാൻ ശ്രമിച്ചെങ്കിലും ടച്ച്​ പാളി.

33ാം മിനിറ്റിലാണ്​ ബംഗളൂരു ഗോൾകീപ്പർ ഗുർപ്രീതിന്​ കാര്യമായൊരു പരീക്ഷണം നേരിടേണ്ടി വന്നത്​. ബോക്സിന്‍റെ വലതുമൂലയിൽ നിന്നുള്ള അടി ഗുർപ്രീത്​ കുത്തിയകറ്റി. റീബൗണ്ടിൽ വിപിൻ മോഹൻ ഷോട്ടുതിർത്തെങ്കിലും ലക്ഷ്യം കണ്ടില്ല. അധികം വൈകാതെ ബംഗളൂരു രണ്ടാം വെടി പൊട്ടിച്ചു. കോയഫിനെ കടന്ന്​ മെൻഡസ്​ നൽകിയ പാസുമായി കുതിച്ച റയാൻ വില്യംസ്​ ഹോർമിപാമിനെ ഡ്രിബ്​ൾ ചെയ്ത്​ ഗോൾകീപ്പർ സച്ചിൻ സുരേഷിന്​ ഒരവസരവും നൽകാതെ ഒന്നാന്തരമായി ഫിനിഷ്​ ചെയ്തു (2-0). പിന്നാലെ, സന്ദർശകരുടെ മധ്യനിരയിൽ വിപിൻ മോഹൻ പരിക്കേറ്റ്​ മടങ്ങുക കൂടി ചെയ്തതോടെ ഇരട്ട ആഘാതമായി. വിപിന്​ പകരം ഡാനിഷ്​ ഫാറൂഖ്​ ​കളത്തിലിറങ്ങി​.

രണ്ടാം പകുതി തുടങ്ങി അഞ്ചാം മിനിറ്റിൽ ജിമനസിന്‍റെ ഗോൾശ്രമം ശ്രമകരമായാണ്​ ഗുർപ്രീത്​ തട്ടിയകറ്റിയത്​. 56ആം മിനിറ്റിൽ കേരളം കാത്തിരുന്ന ഗോളെത്തി. ഇടതുവിങ്ങിൽ നൊവോച്ച ഉയർത്തി നൽകിയ പന്ത്​ ഓടിപ്പിടിച്ച നോഹ ബോക്സിൽനിന്ന്​ നൽകിയ പന്ത്​ ഒന്ന്​ പുറം തിരിഞ്ഞ്​ പുറംകാൽകൊണ്ട്​ ജിമനസ്​ വലയിലാക്കി (2-1). ആക്രമണം കനപ്പിച്ച ബ്ലാസ്​റ്റേഴ്​സ്​ 10 മിനിറ്റിന്​ ശേഷം സമനില ഗോളും കണ്ടെത്തി. കോർണർ കിക്കിൽനിന്ന്​ പന്തുമായി നോഹയും ലൂണയും തുടങ്ങിവെച്ച നീക്കം. പന്ത്​ നൊവോച്ചയിലേക്ക്​. തിരിച്ചചു വാങ്ങിയ പന്ത്​ ലൂണ നേരെ ബോക്സിലേക്ക്​ തിരിച്ചുവിട്ടു. പറന്നിറങ്ങിയ പന്തിൽ ഫ്രെഡ്ഡിയുടെ ടച്ച്​ പോസ്റ്റിലേക്ക്​ (2-2). ബംഗളൂരു പൂർണ പ്രതിരോധത്തിലായ നിമിഷങ്ങൾ. എന്നാൽ, കളിയുടെ ഗതിക്ക്​ വിപരീതമായി ബംഗളൂരു മൂന്നാം ഗോളും നേടി. പെരീറ ഡയസിന്‍റെ അസിസ്റ്റിൽ ചേത്രിയാണ്​ വലകുലുക്കിയത്​ (3-2). 78ാം മിനിറ്റിൽ ബ്ലാസ്​റ്റേഴ്​സ്​ മൂന്നുമാറ്റം വരുത്തി. കോറോ, കൊയഫ്​, സന്ദീപ്​ എന്നിവർക്കു പകരം പ്രീതം കോട്ടാൽ, പ്രബീർദാസ്​, പെപ്ര എന്നിവർ കളത്തിലെത്തി. തൊട്ടില്ലെന്ന മട്ടിൽ പുറത്തേക്ക്​. ഇഞ്ചുറി ടൈമിൽ ഡയസ്​ തന്ത്രപൂർവം നേടിയെടുത്ത ഫ്രീകിക്കിൽനിന്ന്​ ചേത്രി മൂന്നാം ഗോളും കണ്ടെത്തിയതോടെ 4-2.