ഏഷ്യൻ ഹാൻഡ്ബാൾ ചാമ്പ്യൻഷിപ്പിൽ ഇന്ത്യക്കെതിരെ കുവൈത്ത് താരത്തിന്റെ മുന്നേറ്റം
കുവൈത്ത് സിറ്റി: കുവൈത്തിൽ ആരംഭിച്ച 22ാമത് ഏഷ്യൻ ഹാൻഡ്ബാൾ ചാമ്പ്യൻഷിപ്പിൽ കുവൈത്തിന് വിജയത്തുടക്കം. ഉദ്ഘാടന മത്സരത്തിൽ കുവൈത്ത് ഇന്ത്യയെ 46-12 ന് പരാജയപ്പെടുത്തി. മറ്റൊരു മത്സരത്തിൽ യു.എ.ഇ ഹോങ്കോങ്ങിനെ
തറപറ്റിച്ചു.
ആദ്യ മത്സരത്തിൽ ശ്രദ്ധയോടെ തുടങ്ങിയ കുവൈത്ത് ആദ്യ പകുതിയുടെ ആദ്യ പത്ത് മിനിറ്റിനുള്ളിൽ അഞ്ചു ഗോളുകളുടെ ലീഡ് നേടി ലക്ഷ്യം വ്യക്തമാക്കി. 26-6 എന്ന ശക്തമായ സ്കോർ നേടി ആദ്യ പകുതി അവസാനിപ്പിച്ചു. രണ്ടാം പകുതിയിൽ ഇന്ത്യ തിരിച്ചുവരാൻ ശ്രമം നടത്തിയെങ്കിലും കുവൈത്ത് വ്യക്തമായ മുൻതൂക്കം നേടി 46-12 ന് മത്സരം അവസാനിപ്പിച്ചു.
മികച്ച പ്രകടനത്തിന് കുവൈത്തിന്റെ സെയ്ഫ് അൽ അദ്വാനിയെ കളിയിലെ താരമായി തെരഞ്ഞെടുത്തു.
ഈ മാസം 29വരെ കുവൈത്തിൽ നടക്കുന്ന ചാമ്പ്യൻഷിപ്പിൽ 15 രാജ്യങ്ങൾ മാറ്റുരക്കും. ഖത്തർ, റിപ്പബ്ലിക് ഓഫ് കൊറിയ, ഒമാൻ (ഗ്രൂപ്-എ), ബഹ്റൈൻ, ഇറാഖ്, ചൈന, ജോർഡൻ (ഗ്രൂപ്-ബി), കുവൈത്ത്, യു.എ.ഇ, ഹോങ്കോങ്, ഇന്ത്യ (ഗ്രൂപ്-സി), ജപ്പാൻ, ഇറാൻ, സൗദി അറേബ്യ, ആസ്ത്രേലിയ (ഗ്രൂപ്-ഡി) എന്നിവയാണ് രാജ്യങ്ങൾ.
ചാമ്പ്യൻഷിപ്പിലെ മികച്ച നാല് ടീമുകൾ 2027 ജനുവരി 13 മുതൽ 31 വരെ ജർമനിയിൽ നടക്കുന്ന 30ാമത് ഐ.എച്ച്.എഫ് പുരുഷ ഹാൻഡ്ബാൾ ലോക ചാമ്പ്യൻഷിപ്പിന് യോഗ്യത നേടും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.