ഷറഫുവി​െൻറ വ​സി​യ്യ​ത്ത്​ നി​റ​​വേറ്റി ഷാ​ഫി

ദുബൈ: മരണത്തിലേക്ക്​ വിമാനം കയറുന്നതിന്​ മണിക്കൂറുകൾക്ക്​ മുമ്പ്​​ ഷറഫു പിലാശേരി ഏൽപിച്ച നന്മയുടെ നാണയത്തുട്ടുകൾ അവ​ൻെറ ആഗ്രഹംപോലെ പാവങ്ങൾക്കായി ചെലവഴിച്ച്​ സുഹൃത്ത്​ ഷാഫി പറക്കുളം. 'ബാക്ക്​​ ടു ഹോം' എന്ന പോസ്​റ്റിട്ട്​ ദുബൈയിൽനിന്ന്​ വിമാനം കയറിയ കോഴിക്കോട്​ കുന്ദമംഗലം സ്വദേശി ഷറഫുവി​ൻെറ മരണം പ്രവാസലോകത്തിന്​ ഏറെ വേദനയുണ്ടാക്കിയ സംഭവമായിരുന്നു. ഷറഫുവി​ൻെറ ​ആഗ്രഹ സഫലീകരണത്തിനായി ഷാഫിയും സുഹൃത്തുക്കളും ചേർന്ന്​ ലേബർ കാമ്പിലാണ്​ ഭക്ഷണവിതരണം നടത്തിയത്​.

യാത്രാദിവസം പുലർച്ചെ കട തുറന്നയുടൻ കയറിവന്ന ഷറഫുദ്ദീൻ ഷാഫിയെ തുക ഏൽപിക്കുകയായിരുന്നു. യു.എ.ഇയിൽ കുടുങ്ങിക്കിടക്കുന്നവർക്കും ബുദ്ധിമുട്ടുന്നവർക്കും ജോലി ഇല്ലാത്തവർക്കും ഭക്ഷണം നൽകാൻ ഈ തുക ഉപയോഗിക്കണമെന്നായിരുന്നു ഷറഫുവി​ൻെറ നിർദേശം. ലോക്​ഡൗൺ സമയത്തും റമദാൻ മാസത്തിലും പാവങ്ങൾക്ക്​ സൗജന്യമായി ഭക്ഷണം നൽകാൻ സഹായവുമായി ഷറഫു എത്തിയിരുന്നു. ഷറഫു നൽകിയ തുകക്ക്​ പുറമെ സുഹൃത്തുക്കളിൽനിന്നുൾപ്പെടെ ലഭിച്ച പണം ഉപയോഗിച്ചായിരുന്നു ഭക്ഷണം വിതരണം ചെയ്​തത്​. ഭാര്യ അമീന ഷെറിനും മകൾ ഫാത്തിമ ഇസ്സയും ആശുപത്രിയിൽ തുടരുകയാണ്​. മകൾ ഇപ്പോഴും ഐ.സി.യുവിലാണ്​.