ആലുവ: എസ്.എസ്.എൽ.സി പരീക്ഷയിൽ ആലുവ വിദ്യാഭ്യാസ ജില്ലക്ക് മിന്നുന്ന വിജയം. 99 ശതമാനം വിജയത്തോടെയാണ് ആലുവ അഭിമാനനേട്ടം കൈവരിച്ചത്. 12,489 കുട്ടികൾ പരീക്ഷ എഴുതിയതിൽ 12,418 പേർ വിജയിച്ചു. 75 സ്കൂളിന് 100 ശതമാനം വിജയം ലഭിച്ചു. 22 സർക്കാർ സ്കൂൾ 100 ശതമാനം വിജയം കൈവരിച്ചു. എയിഡഡ് വിഭാഗത്തിൽ 36ഉം അൺ എയിഡഡ് വിഭാഗത്തിൽ 17ഉം സ്കൂളുകൾ 100 ശതമാനം കൊയ്തു. കാലടി ചെങ്ങൽ സെൻറ് ജോസഫ് സ്കൂളാണ് കൂടുതൽ കുട്ടികളെ പരീക്ഷക്ക് ഇരുത്തി 100 ശതമാനം വിജയം കരസ്ഥമാക്കി ഒന്നാമതെത്തി. 269 കുട്ടികളാണ് ഇവിടെ പരീക്ഷ എഴുതിയത്. സർക്കാർ വിദ്യാലയങ്ങളിൽ 245 കുട്ടികളെ പരീക്ഷക്കിരുത്തി 100 ശതമാനം നേടിയ കോലഞ്ചേരി കടയിരുപ്പ് ഗവ. സ്കൂൾ മികവ് കാട്ടി. അൺ എയിഡഡ് വിഭാഗത്തിൽ 147 കുട്ടികളെ വിജയിപ്പിച്ച അങ്കമാലി ഡി പോൾ സ്കൂൾ മാതൃകയായി. കുറവ് വിദ്യാർഥികൾ പരീക്ഷ എഴുതി 100 ശതമാനം നേടിയത് മൂക്കന്നൂർ ഗവ. സ്കൂളിലാണ്. ഏഴ് വിദ്യാർഥികൾ മാത്രമാണ് ഇവിടെ പരീക്ഷ എഴുതിയത്. 1179 കുട്ടികൾക്ക് എല്ലാ വിഷയത്തിലും എ പ്ലസ് ലഭിച്ചു. സർക്കാർ വിദ്യാലയങ്ങളിൽനിന്ന് 96 പേരാണ് മുഴുവൻ എ പ്ലസ് നേടിയത്. എയിഡഡ് മേഖലയിൽനിന്ന് 805ഉം അൺ എയിഡഡ് മേഖലയിൽനിന്ന് 278ഉം വിദ്യാർഥികൾ എല്ലാ വിഷയങ്ങളിലും എ പ്ലസ് നേടി.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.