ലിഫ്റ്റ് തകരാറിലായി ആളുകൾ ഉള്ളിൽകുടുങ്ങി

കൊച്ചി: എറണാകുളം സെൻട്രൽ മാളിലെ ലിഫ്റ്റ് തകരാറിലായി ആളുകൾ ഉള്ളിൽ കുടുങ്ങി. ഞായറാഴ്ച വൈകീട്ട് ഏഴരയോടെയാണ് മാളിലെ ആറാം നിലയോടടുത്തുെവച്ച് ലിഫ്റ്റ് പ്രവർത്തനം നിലച്ചത്. ഇതോടെ 20 പേർ ഉള്ളിൽ കുടുങ്ങുകയായിരുന്നു. 11 പേർക്കുമാത്രം കയറാവുന്ന ലിഫ്റ്റിൽ കൂടുതൽ ആളുകൾ കയറിയതാണ് പ്രവർത്തനം നിലക്കാൻ കാരണമായതെന്ന് ഫയർഫോഴ്സ് ഉദ്യോഗസ്ഥർ പറഞ്ഞു. 25 മിനിറ്റോളം ആളുകൾ അകത്ത് കുടുങ്ങിക്കിടന്നു. തുടർന്ന് ക്ലബ് റോഡ് ഫയർ സ്റ്റേഷനിലെ ഉദ്യോഗസ്ഥരെത്തിയാണ് ഇവരെ പുറത്തിറക്കിയത്. ലീഡിങ് ഫയർമാൻ കെ.ബി. പ്രവീൺ, ഗോപി, സച്ചു, ശ്യാം, ടി.കെ. മണി എന്നിവരുടെ നേതൃത്വത്തിലാണ് ആളുകളെ പുറത്തെത്തിച്ചത്.