ബസും ബൈക്കും കൂട്ടിയിടിച്ച് രണ്ടുപേര്‍ മരിച്ചു

കാഞ്ഞങ്ങാട്: മാതോത്ത് അമ്പലത്തിനടുത്ത് ബൈക്കും കെ.എസ്.ആര്‍.ടി.സി ബസും കൂട്ടിയിടിച്ച് രണ്ടുപേര്‍ മരിച്ചു. ബൈക്ക് യാത്രികരായ രാവണീശ്വരം പള്ളത്തുങ്കാൽ സ്വദേശികളായ സുരേഷ് (29), ബൈജു (27) എന്നിവരാണ് മരിച്ചത്. അപകടസ്ഥലത്ത് വെച്ചുതന്നെ ഇരുവരും മരിച്ചു. ഞായറാഴ്ച രാത്രി 7.30നായിരുന്നു അപകടം. നീലേശ്വരത്ത് കലശോത്സവം കഴിഞ്ഞ് മടങ്ങുകയായിരുന്നു ഇരുവരും. കട്ടപ്പന ഭാഗത്തേക്ക് പോവുകയായിരുന്ന കെ.എസ്.ആർ.ടി.സി ബസാണിടിച്ചത്. വാഴക്കോടൻ വളപ്പിൽ ലക്ഷ്മിയുടെ മകനാണ് സുരേഷ്. സഹോദരൻ: രാജേഷ്. വടക്കേ വളപ്പിൽ ശാരദയുടെ മകനാണ് മരിച്ച ബൈജു.