പി.വി.അൻവറിനെതിരായ മിച്ചഭൂമി കേസ്: ഭൂമി തിരിച്ചുപിടിക്കൽ മൂന്ന് മാസത്തിനകം പൂർത്തിയാക്കും

കൊച്ചി: പി.വി. അൻവർ എം.എൽ.എയുടെയും കുടുംബത്തിന്‍റെയും കൈവശമുള്ള മിച്ചഭൂമി തിരിച്ചുപിടിക്കാൻ മൂന്ന്​ മാസത്തിനകം നടപടികൾ പൂർത്തീകരിക്കാനാവുമെന്ന്​ കണ്ണൂർ സോണൽ ലാൻഡ്​ ബോർഡ്​ ചെയർമാൻ ഹൈകോടതിയിൽ.

സർക്കാർ കഴിഞ്ഞ ഒക്​ടോബറിൽ താലൂക്ക് ലാൻഡ് ബോർഡുകളെ സോണൽ ലാൻഡ് ബോർഡുകളും സബ് സോണൽ ബോർഡുകളുമായി പുനഃക്രമീകരിച്ചതും ചുമതലയുണ്ടായിരുന്ന സോണൽ ലാൻഡ് ബോർഡ്​ ചെയർമാൻ അവധിയിൽ പ്രവേശിച്ചതുമടക്കം കാര്യങ്ങളാണ് ഉത്തരവ് നടപ്പാക്കുന്നത് വൈകാൻ കാരണമെന്ന്​ കാട്ടി പുതുതായി ചുമതലയേറ്റ സോണൽ ബോർഡ്​ ചെയർമാൻ ടി.ആർ. രജീഷ്​ നൽകിയ സത്യവാങ്മൂലത്തിലാണ്​ ഇക്കാര്യം ​വ്യക്​തമാക്കുന്നത്​. ഹൈകോടതി ഉത്തരവ് നടപ്പാക്കാൻ കാലതാമസം നേരിടുന്നതിൽ നിരുപാധികം മാപ്പപേക്ഷിച്ചിട്ടുമുണ്ട്​. ഇക്കാര്യംകൂടി പരിഗണിച്ച ജസ്റ്റിസ്​ രാജ വിജയരാഘവൻ വിഷയം ഒക്​ടോബർ 18ന് വീണ്ടും പരിഗണിക്കാൻ മാറ്റി.

ഭൂപരിഷ്കരണ നിയമം ലംഘിച്ച് എം.എൽ.എയും കുടുംബവും കൈവശം വെച്ചിരിക്കുന്ന ഭൂമി തിരിച്ചുപിടിക്കണമെന്ന ഹൈകോടതി ഉത്തരവ് നടപ്പാക്കാത്തത്തിനെ തുടർന്ന് മലപ്പുറം ജില്ല വിവരാവകാശ കൂട്ടായ്മ കോഓഡിനേറ്റർ കെ.വി. ഷാജി നൽകിയ കോടതിയലക്ഷ്യ ഹരജിയിലാണ്​​ ബോർഡ്​ ചെയർമാന്‍റെ വിശദീകരണം. ഇവരുടെ കൈവശമുള്ള പരിധിയിൽ കവിഞ്ഞ ഭൂമി അഞ്ചു മാസത്തിനകം തിരിച്ചുപിടിക്കണമെന്ന 2022 ജനുവരി 13ലെ ഹൈകോടതി ഉത്തരവ് ഇതുവരെ നടപ്പാക്കിയിട്ടില്ലെന്നാരോപിച്ചാണ് ഹരജി.

ജൂലൈ 31ന് ഹരജിക്കാരനെ കേൾക്കാൻ നോട്ടീസ് നൽകിയതായി സത്യവാങ്​മൂലത്തിൽ പറയുന്നു. ഭൂമി തിരികെ പിടിക്കാൻ ആറ് മാസം കൂടി ആവശ്യപ്പെട്ട് താമരശ്ശേരി താലൂക്ക് ലാൻഡ്​ ബോർഡ്​ ചെയർമാൻ നേരത്തേ ഫയൽ ചെയ്ത ഉപഹരജി ഹൈകോടതിയിലുണ്ട്. ഇതോടൊപ്പം ഫയൽ ചെയ്ത സത്യവാങ്മൂലത്തിൽ കോഴിക്കോട്, മലപ്പുറം ജില്ലകളിലായി പി.വി. അൻവറിനും കുടുംബത്തിനും കൈവശമുള്ളത് 22.81 ഏക്കറാണെന്നും വ്യക്തമാക്കിയിരുന്നു. എന്നാൽ, ആലുവ ഈസ്റ്റ് വില്ലേജിലും അൻവറിന് ഭൂമിയുണ്ടെന്ന്​ പരാതിക്കാരൻ അറിയിച്ചതിനെ തുടർന്ന്​ അത് തിട്ടപ്പെടുത്തണമെന്നും ആവശ്യപ്പെട്ടിട്ടുണ്ട്​.

ജൂലൈ 10ന്​ മാത്രം ചുമതലയേറ്റ ബോർഡ്​ ചെയർമാനാണ്​ സത്യവാങ്​മൂലം നൽകിയിരിക്കുന്നത്​. താമരശ്ശേരി താലൂക്ക് ലാൻഡ്​ ബോർഡ്​ സ്പെഷൽ ഡെപ്യൂട്ടി തഹസിൽദാറും സത്യവാങ്മൂലം സമർപ്പിച്ചിട്ടുണ്ട്​.