മോഹനൻ വൈദ്യർ: ഭക്ഷണത്തിലെ മായത്തിനെതിരെ പോരാടി; അലോപ്പതി വിമർശനം വിവാദമായി

ചേർത്തല: ഭക്ഷ്യവസ്​തുക്കളിൽ മായം കലർത്തുന്നത്​ തുറന്നുകാട്ടി ശ്രദ്ധേയനാവുകയും അലോപ്പതി ചികിത്സക്കെതിരെ കടുത്ത വിമർശനങ്ങൾ ഉന്നയിച്ച്​ വിവാദ നായകനാവുകയും ചെയ്​ത പ്രകൃതി ചികിത്സകനാണ്​ ഇന്നലെ അന്തരിച്ച മോഹനൻ നായർ എന്ന മോഹനൻ വൈദ്യർ. അടുക്കളയിൽ ഉപയോഗിക്കുന്ന ഉപ്പുതൊട്ട് കർപ്പൂരം വരെയുള്ള സാധനങ്ങളിൽ കലർപ്പും മായവും ഉണ്ടെന്ന്​ വാദിക്കുകയും അത് ദൃശ്യമാധ്യമങ്ങളിൽ തെളിയിക്കുകയും ചെയ്തതോടെയാണ് വൈദ്യർ ജനശ്രദ്ധ നേടിയത്.

വൈദ്യചികിത്സയിലൂടെ അർബുദത്തെയും വൈറസിനെയും വെല്ലുവിളിച്ച്​ വിവാദങ്ങളിൽ നിറഞ്ഞുനിന്നു. കൊട്ടാരക്കര സ്വദേശിയാണെങ്കിലും 20 വർഷമായി ആലപ്പുഴ ചേർത്തല തണ്ണീർമുക്കം പഞ്ചായത്ത് 19ാം വാർഡിൽ ബിന്ദു നിവാസിലായിരുന്നു താമസം. അങ്ങനെയാണ്​ ചേർത്തലയുമായി അടുത്തബന്ധമുണ്ടായത്​.

ആദ്യം വയലാറിലും പിന്നീട് 11ാം മൈലിന് സമീപവുമായിരുന്നു ചികിത്സകേന്ദ്രം. കരൾ, കിഡ്നി രോഗങ്ങൾക്ക് നാട്ടി​ലേക്കാൾ പേര് മറുനാട്ടിലാണ്. കാസർകോട്​, മലപ്പുറം, കോഴിക്കോട്, ഇടുക്കി അടക്കമുള്ള ജില്ലകളിൽനിന്നാണ് കൂടുതൽ രോഗികൾ എത്തിയിരുന്നത്​.

നിപ പൊട്ടിപ്പുറപ്പെട്ടപ്പോൾ വവ്വാൽ കടിച്ച ഫലങ്ങൾ കഴിക്കരുതെന്നും വവ്വാലുകളിൽനിന്നാണ് ഈ വൈറസ് പകരുന്നതെന്നും ആരോഗ്യപ്രവർത്തകർ മുന്നറിയിപ്പ് നൽകിയപ്പോൾ വവ്വാൽ കടിച്ച മാങ്ങ കഴിച്ച്​ മോഹനൻ വൈദ്യർ വെല്ലുവിളി ഉയർത്തി. നിപ വൈറസ് ആരോഗ്യവകുപ്പി​െൻറയും മരുന്നുകമ്പനികളുടെയും ഗൂഢാലോചനയാണെന്ന് കാണിച്ച്​ സമൂഹ മാധ്യമങ്ങളിൽ പ്രചരിപ്പിച്ചതിന്​ വൈദ്യർക്കെതിരെ കേസെടുത്തു.

വർഷങ്ങൾക്കുമുമ്പ് ഒന്നര വയസ്സുള്ള കുട്ടിക്ക്​ പ്രൊപിയോണിക് അസീഡിമിയ രോഗം ബാധിച്ച് മോഹനൻ വൈദ്യരുടെ ചികിത്സ തേടിയിരുന്നു. എന്നാൽ, ചികിത്സക്കിടെ കുട്ടി മരിച്ചു. ചികിത്സരീതിയിലെ പിഴവാണെന്ന് കാണിച്ച്​ ബന്ധുക്കൾ മാരാരിക്കുളം പൊലീസ് സ്​​േറ്റഷനിൽ പരാതി നൽകിയതോടെ വൈദ്യർക്കെതിരെ കേസെടുത്തു.

ഒരുവർഷം മുമ്പ് ​െകാറോണ​ വൈറസിന് ഒറ്റമൂലി ചികിത്സ ഉണ്ടെന്ന് പ്രചരിപ്പിച്ചതിനാൽ പൊലീസ്​ അറസ്​റ്റ്​ ചെയ്​തിരുന്നു. അവസാനഘട്ടത്തിൽ കോവിഡിനെ വെല്ലുവിളിച്ചെങ്കിലും അത്​ മോഹനൻ വൈദ്യരെ കീഴ്​പെടുത്തി.

സംസ്കാരം തിങ്കളാഴ്​ച ചേർത്തലയിൽ നടക്കും. ഭാര്യ: ലത. മക്കൾ: രാജീവ്, ബിന്ദു. മരുമകൻ: പ്രശാന്ത്.