മല്ലപ്പള്ളി-തിരുവല്ല റൂട്ടിൽ സ്വകാര്യ ബസുകളുടെ മത്സരയോട്ടം

മല്ലപ്പള്ളി: മലപ്പള്ളി-തിരുവല്ല റൂട്ടിൽ സ്വകാര്യ ബസുകളുടെ മത്സരയോട്ടം അപകടങ്ങൾക്ക് ഇടയാക്കുന്നു. ഈ റൂട്ടിൽ ബസുകൾ സമയ കൃത്യത പാലിക്കാതെയാണ് സർവിസ് നടത്തുന്നതെന്ന പരാതി നേരത്തേ ഉയർന്നിട്ടുള്ളതാണ്. മിക്ക ബസുകളും സമയത്തിന് സ്റ്റാൻഡിൽനിന്ന്​ ഇറങ്ങുന്നുണ്ടെങ്കിലും പിന്നീട് പുറകെ വരുന്ന ബസുകളുടെ സമയമെടുത്ത് ഇഴഞ്ഞുനീങ്ങുകയാണ്. സമയം കഴിയുമ്പോൾ പിന്നെ മരണപ്പാച്ചിലാണ്. യാത്രക്കാർ ജീവൻ പണയംവെച്ചാണ് ഈ റൂട്ടിൽ യാത്രചെയ്യുന്നത്. ബസുകൾ തമ്മിൽ ഉരസലും ജീവനക്കാരുടെ വാഗ്വാദങ്ങളും നിത്യസംഭവമാണ്. എന്നിട്ടും അധികൃതരുടെ ഭാഗത്തുനിന്ന്​ നടപടി ഉണ്ടാകുന്നില്ലെന്നാണ് നാട്ടുകാരുടെ പരാതി. ബസുകളുടെ അമിതവേഗം നിയന്ത്രിക്കുന്നതിന് നടപടി ഉണ്ടാകണമെന്ന ആവശ്യം ശക്തമാണ്.