അക്കാലവും കടന്നുപോയി പുതിയ അധ്യയന വർഷത്തിന്​ വീണ്ടും മണിമുഴക്കം

ഇതിനകം 6000 കുട്ടികൾ പ്രവേശനം നേടിയതായി കണക്കാക്കുന്നു പത്തനംതിട്ട: മഹാമാരിയെയും അതിജീവിച്ച്​ രണ്ട് വർഷത്തിനുശേഷം പുതിയ അധ്യയനവർഷത്തിന്​ ബുധനാഴ്ച സ്​കൂളുകളിൽ മണിമുഴങ്ങും. അക്ഷരമുറ്റത്തേക്ക് ചുവടുവെച്ച് കുരുന്നുകൾ ഇന്ന് പടികയറും. അക്ഷര തൊപ്പി അണിയിച്ചും ബലൂണുകൾ നൽകിയും മധുരം വിതരണം ചെയ്തുമൊക്കെ പുതിയ കൂട്ടുകാരെ സ്വീകരിക്കും. പ്രവേശനോത്സവവുമായി ആദ്യമായി സ്കൂളിലെത്തുന്നവരുടെ വരവേൽപ് ​ആഘോഷമാക്കാൻ സ്കൂൾ അധികൃതരും തയാറെടുത്തുകഴിഞ്ഞു. ജില്ല, ബ്ലോക്ക്, പഞ്ചായത്ത്​ തലങ്ങളിൽ പ്രവേശനോത്സവം നടത്തുന്നുണ്ട്. വിവിധ വിദ്യാഭ്യാസ ഉപജില്ലകളിൽ കുരുന്നുകളെ വരവേൽക്കാനുള്ള ഒരുക്കം പൂർത്തിയായതായി അധികൃതർ പറഞ്ഞു. ജില്ലതല പ്രവേശനോത്സവം ആറന്മുള ഗവ. വൊക്കേഷനൽ ഹയർ സെക്കൻഡറി സ്കളിൽ രാവിലെ 10.15ന്​ നടക്കും. ഇത്തവണ ഒന്നാം ക്ലാസിൽ കൂടുതൽ കുട്ടികൾ എത്തുമെന്നാണ്​ അധ്യാപകർ പറയുന്നത്.​ സർക്കാർ, എയ്​ഡഡ്​ സ്​കൂളുകളിൽ ഒന്നാം ക്ലാസിൽ പ്രവേശനം തുടരുകയാണ്​. ഇതിനകം 6000 അധികം കുട്ടികൾ പ്രവേശനം നേടിയതായി കണക്കാക്കുന്നു. പാഠപുസ്തകങ്ങൾ മുഴുവൻ സ്​കൂളുകളിലും എത്തിയിട്ടുണ്ട്​. ​ ജില്ലയിലെ 11 ഉപജില്ലകളിൽ 123 സ്​കൂളുകളാണ്​ പാഠപുസ്തക വിതരണത്തിന്​ സൊസൈറ്റികളായി പ്രവർത്തിക്കുന്നത്​. ഇവിടങ്ങളിൽനിന്ന് അധ്യാപകർ പുസ്തകങ്ങൾ സ്കൂളുകളിൽ എത്തിച്ചിട്ടുണ്ട്​. മിക്ക സ്കൂളുകളിലും അധ്യാപകരുടെ ഒഴിവുണ്ട്.​ ഒഴിവുകൾ നികത്തുന്നതിനുള്ള അഭിമുഖങ്ങൾ നടന്നുവരികയാണ്​. കുട്ടികൾക്കുള്ള കോവിഡ്​​ വാക്സിനേഷൻ നടപടികളും പുരോഗമിക്കുന്നു. ഒരുഡോസുപോലും എടുക്കാത്ത കുട്ടികളും ഉണ്ട്​. ഇവർക്കും ആദ്യഡോസ്​ എടുക്കുന്നതിനുള്ള നടപടികളായി​. ആരോഗ്യവകുപ്പ്​ നേതൃത്വത്തിൽ പ്രാഥമിക ആരോഗ്യ കേ​ന്ദ്രങ്ങൾ വഴി വാക്​സിസിനേഷൻ ഡ്രൈവ്​ ഉടൻ ആരംഭിക്കും. സ്കൂൾ ബസുകളുടെ ഫിറ്റ്​നസ്​ പരിശോധന കഴിഞ്ഞയാഴ്ച പൂർത്തിയായിരുന്നു. സ്കൂൾ വാഹനങ്ങളുടെ പരിശോധന കർശനമാക്കാനാണ്​ തീരുമാനം. സ്​കൂൾ ബസ്​ ഡ്രൈവർമാർക്കുള്ള പരിശീലനവും നടന്നുവരികയാണ്.​ ഇത്തവണ സ്കൂൾ വിപണിയിലും നല്ല ഉണർവുണ്ട്​. കോവിഡ് മൂലം നഷ്ടപ്പെട്ട കച്ചവടം തിരിച്ചുപിടിക്കാൻ കഴിഞ്ഞതായി വ്യാപാരികൾ പറഞ്ഞു. തയ്യൽ കടകളിലും യൂനിഫോം തുന്നൽ തകൃതിയായി നടക്കുകയാണ്​.