മോഹങ്ങൾ ബാക്കിവെച്ച്​ ഡോ.സി.ബി. റജിയുടെ മടക്കം

കൊല്ലം: ചെറുപ്രായത്തിൽ ഹൃദയത്തിന്​ തകരാറുണ്ടെന്ന മെഡിക്കൽ റിപ്പോർട്ടിന്​ മുന്നിൽ പതറാതെ, വിദഗ്​ധ പരിശോധനകളിലൂടെ അനുകൂല റിപ്പോർട്ട്​ നേടി ഇടിച്ചുകയറിയൊരു കഥയുണ്ട്​ ഡോ. സി.​ബി. റെജിക്ക്​. അന്ന്​ ആ പരിശോധനഫലം കൊല്ലം ഇൻഫന്‍റ്​ ജീസസ്​ സ്കൂളിലെ ആ മിടുക്കൻ വിദ്യാർഥിയെ കൈപിടിച്ചുകയറ്റിയത്​​ ബോക്​സിങ്​ റിങ്ങിലേക്കായിരുന്നു.

അവിടെ ദേശീയതാരമായും അന്താരാഷ്​ട്ര ടെക്നിക്കൽ ഒഫിഷ്യലായും പേരെടുത്ത തിരുമുല്ലവാരം പുന്നത്തല വിഷ്‌ണത്തുകാവ്‌ നഗർ 92 അശ്വതിയിൽ ഡോ. സി.ബി.റെജി (48) ഇന്ന്​ സ്വപ്നങ്ങൾ പാതിയിലാക്കി വിടപറയുമ്പോൾ നാടിന്​ നഷ്ടമായത്​ അസാമാന്യ പ്രതിഭയെ. ചെറിയച്ഛനായ ദ്രോണാചാര്യ അവാർഡ്​ ജേതാവായ ബോക്സിങ്​ പരിശീലകൻ ഡി. ചന്ദ്രലാലിന്‍റെ വഴിയിലൂടെയാണ്​ ​സി.ബി. റജി ബോക്​സിങ്​ രംഗത്തെത്തിയത്​.

ദേശീയതാരമായിരിക്കെ ബോക്സിങ്​ ടെക്നിക്കൽ ഒഫിഷ്യലായി. അന്താരാഷ്ട്രതലത്തിലും ഒഫിഷ്യലായി പ്രവർത്തിച്ചു. പിന്നീട്​ സംഘാടകനായും വിവിധ റോളുകളിൽ തിളങ്ങി. ബോക്സിങ്​ രംഗത്ത്​ വലിയ ഉയരങ്ങൾ കീഴടക്കേണ്ടിയിരുന്ന സ്വപ്നവഴിയിൽനിന്ന്​ അപ്രതീക്ഷിതമായാണ്​ രോഗക്കിടക്കയിലേക്ക്​ അദ്ദേഹം വീണത്​.

അറിയപ്പെടുന്ന ബോക്സിങ്​ ​ഒഫിഷ്യലായിരിക്കെ കണ്ണനല്ലൂർ റിഫായ്​ എന്ന സ്വന്തം ഹോമിയോ ആശുപത്രിയിലൂടെ നിരവധി പേർക്ക്​ ആശ്വാസം നൽകിയ ഡോക്ടർ കൂടിയായിരുന്നു അദ്ദേഹം. കൂട്ടത്തിൽ ആനകളുടെയും ചികിത്സകനായി പേരെടുത്തു. 2020 ഒക്​ടോബർ 26ന്​ കൊല്ലം മാടൻനടയിൽ ആനയുടെ ചികിത്സക്കിടെ പാമ്പ്​ കടിയേറ്റ​ത്​ അദ്ദേഹത്തെ ആശുപത്രി കിടക്കയിൽ​ തളച്ചിടുകയായിരുന്നു.

ഇരുട്ടത്ത്​ പാമ്പ്​ കടിച്ചതാണെന്ന്​ മനസ്സിലായിരുന്നില്ല. കാലിലെ മുറിവ്​ വലിയ ഈച്ച കടിച്ചതാണെന്ന്​ കരുതി ചികിത്സിച്ചു. എന്നാൽ, നാളുകൾ കഴിയുംതോറും അദ്ദേഹത്തിന്‍റെ ആരോഗ്യസ്ഥിതി വഷളായി. എട്ട്​ മാസത്തിനുശേഷം കാഴ്ച മങ്ങിയതോടെ മധുര അരവിന്ദ്​ കണ്ണാശുപത്രിയിൽ എത്തിയപ്പോഴാണ്​ പാമ്പ്​ കടിച്ചതാണെന്ന സംശയമുണ്ടായതും പരിശോധനയിൽ സ്ഥിരീകരിച്ചതും.

അപ്പോഴേക്കും ഇരുവൃക്കയും തകരാറിലായിരുന്നു. തുടർന്ന്​ ചികിത്സ നടത്തിവരികയായിരുന്നു. ചികിത്സ പൂർത്തിയാക്കി ​പ്രിയപ്പെട്ട ബോക്സിങ്​ റിങ്ങിലേക്ക്​ മടങ്ങണമെന്ന പ്രതീക്ഷകൾ പങ്കുവെച്ചിരുന്ന ഡോ. സി.ബി. റെജി പക്ഷേ സ്വപ്നങ്ങളെല്ലാം പാതിയിൽ വിട്ട്​ എന്നന്നേക്കുമായി റിങ്​ വി​ട്ട്​ മടങ്ങി.