കണ്ണൂർ: നോർത്ത് മലബാർ ചേംബർ ഓഫ് കോമേഴ്സിന്റെ നേതൃത്വത്തിലുള്ള ആറാമത് കണ്ണൂർ ബീച്ച് റൺ ഞായറാഴ്ച പയ്യാമ്പലം പാർക്കിൽ നടക്കും. ആരോഗ്യവും കായിക ക്ഷമതയുമുള്ള ജനതയാണ് നാടിന്റെ സമ്പത്ത് എന്ന ആഹ്വാനവുമായാണ് ബീച്ച് റൺ സംഘിപ്പിക്കുന്നതെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. പയ്യാമ്പലം പാർക്കിൽ രാവിലെ ആറിന് പരിപാടി തുടങ്ങും. പയ്യാമ്പലം ബീച്ചിൽ നിന്ന് തുടങ്ങി കടൽത്തീരത്തിലൂടെ നീർക്കടവ് വരെയും തിരിച്ചും പത്തുകിലോ മീറ്ററാണ് മത്സരം സംഘടിപ്പിക്കുക. പത്തുകിലോ മീറ്ററിലുള്ള എലൈറ്റ് മത്സരത്തിൽ രാജ്യാന്തര താരങ്ങൾ അണിനിരക്കും. മത്സരത്തിൽ ഒന്നാം സ്ഥാനത്തെത്തുന്ന താരത്തിന് അരലക്ഷം സമ്മാനമായി നൽകും. അമച്വർ, വെറ്ററൻസ്, ഹെൽത്ത് വിഭാഗം എന്നിങ്ങനെയുള്ള വിഭാഗത്തിൽ സ്ത്രീകൾക്കും പുരുഷന്മാർക്കുമായി പ്രത്യേക മത്സരം നടക്കും.
കൂടാതെ ചേംബർ അംഗങ്ങൾക്കും കുടുംബാംഗങ്ങൾക്കുമായി ഓട്ട മത്സരം നടത്തും. ആയിരത്തിന് മുകളിൽ പേർ മത്സരിക്കുന്ന പരിപാടിയിൽ മൂന്നര ലക്ഷത്തോളം രൂപ പ്രൈസ് മണി വിതരണം ചെയ്യും. കൂടാതെ ഓട്ടം പൂർത്തീകരിക്കുന്ന എല്ലാവർക്കും മെഡലും സർട്ടിഫിക്കറ്റും വിതരണം ചെയ്യും. വാർത്തസമ്മേളനത്തിൽ ചേംബർ പ്രസിഡന്റ് ടി.കെ. രമേഷ് കുമാർ, സച്ചിൻ കുര്യത്ത്, സി. അനിൽ കുമാർ, എ.കെ. റഫീഖ്, കെ. നാരായണൻ കുട്ടി എന്നിവർ പങ്കെടുത്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.