വിശ്രമകേന്ദ്രത്തിന്‍റെ പണി പൂർത്തിയായി

ഫോർട്ട്കൊച്ചി: താലൂക്ക് ആശുപത്രിയിലെ ഡയാലിസിസ് സെന്ററിൽ ഡയാലിസിസ് ചെയ്യാനെത്തുന്നവരോടൊപ്പം സഹായത്തിന്​ എത്തുന്നവർക്ക് വിശ്രമിക്കാനുള്ള കേന്ദ്രത്തിന്റെ നിർമാണം പൂർത്തിയായി. ഡയാലിസിസ് രോഗികളോടൊപ്പം എത്തുന്നവർ അഞ്ചും ആറും മണിക്കൂർ കാത്തിരിക്കേണ്ടി വരുന്നുണ്ട്. ഇവർ നിലവിൽ സെന്ററിന്റെ പുറത്ത് കാത്തുനിൽക്കേണ്ട അവസ്ഥയാണ്. പ്രതിദിനം 18 പേരെയാണ് ഇവിടെ ഡയാലിസിസിന് വിധേയമാക്കുന്നത്. നാലുകെട്ട് മാതൃകയിലാണ് അഞ്ച് ലക്ഷം രൂപ വിനിയോഗിച്ച് വിശ്രമകേന്ദ്രം നിർമിച്ചത്. കേന്ദ്രം ഉടൻ പ്രവർത്തനം ആരംഭിക്കുമെന്ന് നഗരസഭ ആരോഗ്യകാര്യ സ്ഥിരം സമിതി അധ്യക്ഷൻ ടി.കെ. അഷറഫ് പറഞ്ഞു. ചിത്രം: ഫോർട്ട്കൊച്ചി താലൂക്ക് ആശുപത്രിയിൽ ഡയാലിസിസ് രോഗികളുടെ കൂട്ടിരിപ്പുകാർക്ക്​ നിർമിച്ച വിശ്രമകേന്ദ്രം