ബേക്കൽ റെസ്റ്റ് ഹൗസ് റെസ്റ്റിലാണ്...​

കാസർകോട്​: ജില്ലയുടെ വിലാസമായ ബേക്കൽ കോട്ടയിൽ എത്തുന്നവർ ചോദിക്കുന്ന കാര്യമുണ്ട്​. എന്തിനാണീ കെട്ടിടം ഇങ്ങനെ നിർത്തുന്നത്​. മേൽക്കൂരപോലും ഏതുനിമിഷവും നിലം പൊത്താവുന്ന ബേക്കൽ റെസ്റ്റ്​ ഹൗസ്​ അടഞ്ഞുകിടക്കാൻ തുടങ്ങിയിട്ട്​ രണ്ടു പതിറ്റാണ്ട് പിന്നിട്ടു. ഉടൻ നന്നാക്കും, തുറക്കും, മ്യൂസിയമാക്കും തുടങ്ങി മറുപടി കേട്ടിട്ട്​ സഞ്ചാരികൾക്കും മടുത്തു. ഓടും കഴുക്കോലും ഏത്​ നിമിഷവും വീഴാവുന്ന സ്ഥിതിയാണ്​. പ്രായമുള്ളവർ ഉൾപ്പെടെ ഇവിടെ കയറിയിരിക്കുമ്പോൾ ഭാഗ്യം കൊണ്ടുമാത്രമാണ്​ അപകടമില്ലാതെ രക്ഷപ്പെടുന്നത്​. ബ്രിട്ടീഷ്​ ഭരണകാലത്ത്​ 1909ൽ നിർമിച്ചതാണ് കെട്ടിടം. തൂണുകളിൽ ഇപ്പോഴും ബ്രിട്ടീഷ് നിർമിതിയുടെ ശേഷിപ്പുകളുണ്ട്​. മൂന്ന്​ അറ്റാച്ച്ഡ് ബാത്ത് റൂം, ഹാൾ, പൂമുഖം ഉൾപ്പെടെ ഉള്ളതാണ് കെട്ടിടം. പുറത്ത് രണ്ട്​ ശുചിമുറി, അടുക്കള, ബ്രിട്ടീഷ് കാലത്ത് കുതിരയെ കെട്ടാൻ ഉപയോഗിച്ചിരുന്ന ഷെൽട്ടർ തുടങ്ങിയ സൗകര്യങ്ങൾ വേറെ​. റെസ്റ്റ് ഹൗസിലേക്ക് ഭൂഗർഭ കേബിൾ വഴിയാണ് വൈദ്യുതി കണക്​ഷൻ നൽകിയിരുന്നത്. ഈ കേബിൾ മുറിഞ്ഞ് ആറുവർഷമായതിനാൽ വൈദ്യുതിയുമില്ല. കോട്ടയുടെ അകത്തും പുറത്തുമായി 35 ഏക്കറിലേറെ സ്ഥലം ആർക്കിയോളജിക്കൽ സർവേ ഓഫ് ഇന്ത്യയുടെ ഉടമസ്ഥതയിലാണ്​. റെസ്റ്റ് ഹൗസും അതോടൊപ്പമുള്ള മൂന്നേക്കർ സ്ഥലവും സംസ്ഥാന സർക്കാറിന്റേതും. കെട്ടിടവും സ്ഥലവും വിട്ടുകിട്ടിയാൽ ഒരു വർഷത്തിനകം കെട്ടിടം അറ്റകുറ്റപ്പണി നടത്താമെന്നാണ്​ ആർക്കിയോളജിക്കൽ സർവേ ഓഫ് ഇന്ത്യയുടെ നിലപാട്​. ഇക്കാര്യം ബന്ധപ്പെട്ടവരെ അറിയിച്ചിട്ടുമുണ്ട്​. കെട്ടിടം സഞ്ചാരികൾക്കായി ഉപയോഗപ്പെടുത്തി ചരിത്ര സ്മാരകമായി നിലനിർത്താനുള്ള ആവശ്യമാണ് ഉയരുന്നത്. മ്യൂസിയം ആക്കണമെന്നും ആവശ്യമുണ്ട്​. ബേക്കൽ കോട്ടയിൽനിന്ന് കുഴിച്ചെടുത്ത ചരിത്ര ശേഷിപ്പുകൾ ആർക്കിയോളജിക്കൽ സർവേ ഓഫ് ഇന്ത്യയുടെ ലോക്കറിൽ ഉണ്ട്​. മ്യൂസിയമാക്കിയാൽ അതെല്ലാം ഉപ​യോഗ​പ്പെടുത്താനാവും. കെട്ടിടം അറ്റകുറ്റപ്പണി നടത്തി വിനോദസഞ്ചാരികളുടെ ആവശ്യത്തിന് ഉപയോഗപ്പെടുത്താൻ ആർക്കിയോളജിക്കൽ സർവേ ഓഫ് ഇന്ത്യ അധികൃതർക്ക് ബി.ആർ.ഡി.സി പദ്ധതി സമർപ്പിച്ചിട്ടുണ്ട്. എല്ലാം പറയാൻ തുടങ്ങിയിട്ട്​ വർഷങ്ങൾ കടന്നുപോയതല്ലാതെ ഒന്നും നടക്കുന്നില്ല. bakel rest house 1 ​ബേക്കൽ റെസ്റ്റ്​ ഹൗസിന്‍റെ മേൽക്കൂര ​തകർന്ന നിലയിൽ bakel rest house 2 ബേക്കൽ റെസ്റ്റ് ​ഹൗസ്​