നാളികേരപ്പന്തൽ പേരേയുള്ളൂ, തുറക്കില്ല

ചെറുവത്തൂർ: കാലിക്കടവ് ദേശീയപാതക്കരികിൽ ഒരു നാളികേരപ്പന്തലുണ്ട്. പിലിക്കോട് പഞ്ചായത്തിന് കീഴിലെ ഈ പന്തൽ നിലവിൽ പേരു മാത്രമായി ഒതുങ്ങി. കോവിഡ്​ തുടങ്ങുമ്പോൾ അടച്ചിട്ട പന്തൽ തുറക്കാത്തത് മാസങ്ങളായി. ചൂട് കാലത്ത് പൊതുജനങ്ങൾക്കും യാത്രക്കാർക്കും ഒരുപോലെ ഉപകാരപ്പെടുന്നതിനായി വർഷങ്ങൾക്ക് മുമ്പ് ആരംഭിച്ച സ്ഥാപനമാണിത്. പയ്യന്നൂർ വിട്ടാൽ ഇത്തരം പന്തൽ കാലിക്കടവിലായിരുന്നു. അധികൃതർ വേണ്ടത്ര ശ്രദ്ധിക്കാത്തതിനാൽ പിന്നീട് കച്ചവടം നന്നേ കുറഞ്ഞു . കൊറോണ മഹാമാരിക്കാലത്ത് 2020 മാർച്ചിൽ അടച്ചിട്ട ശേഷം തുറന്നതുമില്ല. വൈദ്യുതി ഇല്ലാത്തത് ഈ പന്തലി​‍ൻെറ പ്രവർത്തനത്തെ ബാധിച്ചിരുന്നു. സൗരോർജ വൈദ്യുതി ഉണ്ടെങ്കിലും ഫ്രിഡ്ജ് പോലുള്ള ഉപകരണങ്ങൾ പ്രവർത്തിപ്പിക്കാൻ പറ്റിയ സാഹചര്യമില്ല. അടച്ചിട്ട ഇളനീർ പന്തൽ എത്രയും വേഗത്തിൽ ജനങ്ങൾക്കു വേണ്ടി തുറന്നു കൊടുക്കണം എന്നതാണ് നാട്ടുകാരുടെ ആവശ്യം . കേര കർഷകരിൽ നിന്നും ഇളനീർ വാങ്ങുക വഴി കർഷകർക്കും ആശ്വാസമായിരുന്നു ഈ പന്തൽ. പടം.. അടച്ചിട്ട കാലിക്കടവിലെ നാളികേരപ്പന്തൽ