മട്ടാഞ്ചേരി: ഹാജി ഈസ ഹാജി മൂസ മെമ്മോറിയൽ ഹൈസ്കൂൾ ഘട്ടമായി അടച്ചുപൂട്ടാനുള്ള മാനേജ്മെന്റിന്റെ നീക്കത്തിനെതിരെ നാട്ടുകാർ നടത്തുന്ന പ്രക്ഷോഭം അനുദിനം ശക്തമായി വരുന്നതോടെ രഹസ്യാന്വേഷണ വിഭാഗം സ്കൂൾ സംബന്ധമായ വിവരങ്ങൾ ശേഖരിച്ചു തുടങ്ങി. സ്കൂൾ സർക്കാർ ഏറ്റെടുക്കണമെന്ന ജനകീയ ആവശ്യം ശക്തമായ പശ്ചാത്തലത്തിലാണ് പൊലീസ് രഹസ്യാന്വേഷണ വിഭാഗത്തിന്റെ വിവരശേഖരണം.
സ്പെഷൽ ബ്രാഞ്ച് പൊലീസ് ഇൻസ്പെക്ടർ കെ.എക്സ്. സിൽവസ്റ്ററിന്റെ നേതൃത്വത്തിലാണ് വിവരങ്ങൾ ശേഖരിച്ചത് .സ്കൂൾ അധികൃതരിൽനിന്നും പി.ടി.എ ഭാരവാഹികൾ, സംരക്ഷണ സമിതി ഭാരവാഹികൾ എന്നിവരിൽനിന്നും വിവരങ്ങൾ ശേഖരിച്ചു. ഇതിനിടെ സ്കൂൾ സംരക്ഷണവുമായി ബന്ധപ്പെട്ട് പ്രതിഷേധം ശക്തമാക്കാനാണ് വിവിധ സംഘടനകളുടെ നീക്കം.
സ്കൂൾ സംരക്ഷിക്കണമെന്നും സർക്കാർ ഏറ്റെടുക്കണമെന്നും ആവശ്യപ്പെട്ട് പി.ടി.എയും സ്കൂൾ സംരക്ഷണ സമിതി ഭാരവാഹികളും കെ.ജെ. മാക്സി എം.എൽ.എയുടെ നേതൃത്വത്തിൽ മുഖ്യമന്ത്രി, വിദ്യാഭ്യാസ മന്ത്രി എന്നിവർക്ക് നിവേദനം നൽകിയിരുന്നു. സർക്കാറിൽനിന്ന് അനുകൂല സമീപനമാണുള്ളതെന്ന് പി.ടി.എ പ്രസിഡന്റ് കെ.ബി. അഷറഫ് പറഞ്ഞു. മട്ടാഞ്ചേരിയിലെ സാധാരണക്കാരായ കുട്ടികൾ പഠിക്കുന്ന 80 വർഷത്തിലധികം പഴക്കമുള്ള സ്കൂളാണിത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.