രാജ്യത്ത്​ മൂന്നുലക്ഷം ഐസൊലേഷൻ കിടക്കകൾ സജ്​ജീകരിക്കുമെന്ന്​ റെയിൽവേ; ഓക്​സിജൻ എക്​സ്​പ്രസ്​ ഓടിക്കും

ന്യൂഡൽഹി: കോവിഡ്​ വ്യാപനത്തിനെതിരായ പോരാട്ടത്തിന്‍റെ ഭാഗമായി രാജ്യത്ത്​ 'ഓക്​സിജൻ എക്​സ്​പ്രസ്​' ട്രെയിൻ സർവിസ്​ ആരംഭിക്കുന്നതിന്​ റെയിൽവേ സജ്​ജമാണെന്ന്​ കേന്ദ്ര റെയിൽമന്ത്രി പിയൂഷ്​ ഗോയർ വ്യക്​തമാക്കി. രാജ്യത്തിന്‍റെ വിവിധ ഭാഗങ്ങളിൽ രോഗികൾക്ക്​ വേഗത്തിലും കൂടിയ അളവിലും ഓക്​സിജൻ ലഭ്യമാക്കുന്നതിന്​ ഇത്​ സഹായിക്കുമെന്ന്​ അദ്ദേഹം വ്യക്​തമാക്കി. മധ്യപ്രദേശും മഹാരാഷ്​ട്രയും പോലുള്ള സംസ്​ഥാനങ്ങളിൽ ഓക്​സിജൻ ലഭിക്കാതെ കോവിഡ്​ രോഗികൾ മരിക്കുന്നെന്ന വാർത്തകൾ പുറത്തുവന്ന സാഹചര്യത്തിലാണ്​ റെയിൽവേയുടെ ഈ നീക്കം.

ഓക്​സിജൻ എക്​സ്​പ്രസുകളുടെ യാത്ര സുഗമമാക്കുന്നതിന്​ ഗ്രീൻ കോറിഡോറുകൾ (എതുസമയത്തും കടന്നുപോകാവുന്ന ട്രാക്കുകൾ) സജ്​ജമാക്കുമെന്നും മന്ത്രി വ്യക്​തമാക്കി. ലിക്വിഡ്​ മെഡിക്കൽ ഓക്​സിജനും (എൽഎംഒ) ഓക്​സിജൻ സിലിണ്ടറുകളുമാണ്​ ട്രെയിനുകളിലൂടെ വിവിധ സംസ്​ഥാനങ്ങളിൽ എത്തിക്കുക. എൽഎംഒ ടാങ്കറുകൾ റെയിൽ മാർഗം എത്തിക്കുന്നതിന്‍റെ സാധ്യത പരിഗണിക്കണമെന്ന്​ ആവശ്യപ്പെട്ട്​ മധ്യപ്രദേശും മഹാരാഷ്​​്ട്രയും റെയിൽവേ മന്ത്രാലയത്തെ സമീപിച്ചിരുന്നു.

സംസ്​ഥാനങ്ങൾ ആവശ്യപ്പെടുന്നത്​ അനുസരിച്ച്​ രാജ്യത്ത്​ മൂന്ന്​ ലക്ഷം വരെ ഐ​െസാലേഷൻ കിടക്കകൾ ട്രെയിൻ ബോഗികളിൽ സജ്​ജീകരിക്കാൻ റെയിൽവേക്ക്​ കഴിയുമെന്നും മന്ത്രി വ്യക്​തമാക്കി. 800 ബെഡുകളുള്ള 50 കോവിഡ്​ 19 ഐസൊലേഷൻ കോച്ചുകൾ ദൽഹിയിലെ ശകുർ ബസ്​തി സ്​റ്റേഷനിലും 25 കോച്ചുകൾ അനന്ദ്​ വിഹാർ സ്​റ്റേഷനിലും ലഭ്യമാണെന്നും അദ്ദേഹം പറഞ്ഞു.