ഗ്യാനേഷ് കുമാറിന്റെ രാജി ആഹ്വാനത്തിനിടെ തെരഞ്ഞെടുപ്പ് കമീഷന്റെ അസാധാരണ യോഗം; എസ്.ഐ.ആർ ഫോം ആറിൽ മാറ്റമില്ല
ന്യൂഡൽഹി: മുഖ്യ തെരഞ്ഞെടുപ്പ് കമീഷണർ ഗ്യാനേഷ് കുമാറിന്റെ രാജിക്കായുള്ള മുറവിളിക്കിടെ നിർണായക യോഗം ചേർന്ന് തെരഞ്ഞെടുപ്പ് കമീഷൻ. എസ്.ഐ.ആറിലെ പരാതികളും അംഗങ്ങൾക്കിടയിലെ വിയോജിപ്പുകളും യോഗത്തിൽ ചർച്ചയായി.
വോട്ടർമാരുടെ രജിസ്ട്രേഷനായുള്ള ഫോം ആറ്, സാങ്കേതിക സംവിധാനമായ ECINET എന്നിവയുടെ സുതാര്യത ഉറപ്പാക്കും. ഐ.ടി സംവിധാനങ്ങൾ അവലോകനം ചെയ്യുന്നതിനായി വിദഗ്ധ സമിതിയെ നിയോഗിക്കാനും യോഗം തീരുമാനിച്ചതായി കമീഷൻ അറിയിച്ചു. കമീഷൻ അംഗങ്ങൾക്കിടയിൽ ഭിന്നതയില്ലെന്നും തീവ്രവോട്ടർ പട്ടിക പരിഷ്കരണം നടത്താനുള്ള തീരുമാനം ഏകകണ്ഠമായിരുന്നുവെന്ന് കമീഷൻ വ്യക്തമാക്കി.
ഡൽഹിയിലെ എസ്.ഐ.ആർ തീയതി നീട്ടിയതായി കമീഷൻ അറിയിച്ചു. പൊരുത്തക്കേടുകൾ ചൂണ്ടിക്കാട്ടി കമീഷൻ നോട്ടീസ് അയച്ചവർ ഇലക്ടറൽ രജിസ്ട്രേഷൻ ഓഫിസർക്ക് മുമ്പാകെ ഹിയറിങ്ങിനായി നേരിട്ട് ഹാജരാകേണ്ടതില്ല. മുഖ്യ തെരഞ്ഞെടുപ്പ് കമീഷണർ ഗ്യാനേഷ് കുമാർ, തെരഞ്ഞെടുപ്പ് കമീഷണർമാരായ സുഖ്ബീർ സിങ് സന്ധു, വിവേക് ജോഷി എന്നിവരാണ് യോഗത്തിൽ പങ്കെടുത്തത്. ഡൽഹിയിലെ വോട്ടർ പട്ടികയിൽനിന്ന് വ്യാപകമായി പേരുകൾ വെട്ടിമാറ്റുന്നെന്ന പരാതി കമീഷൻ ചർച്ച ചെയ്തു.
ഡൽഹിയിലെ എസ്.ഐ.ആറുമായി ബന്ധപ്പെട്ട പരാതികളും ആക്ഷേപങ്ങളും സമർപ്പിക്കാനുള്ള തീയതി ഒക്ടോബർ 30 വരെയാണ് കമീഷൻ നീട്ടിയത്. ഇവ തീർപ്പാക്കുന്നതിനുള്ള അവസാന തീയതി നവംബർ 30 ആണ്. മഹാരാഷ്ട്രയിലെ എസ്.ഐ.ആർ കാലാവധിയും നീട്ടി. പൊരുത്തക്കേടുകൾ ചൂണ്ടിക്കാട്ടി നോട്ടീസ് ലഭിച്ചവരുടെ വീടുകൾ ബൂത്ത് ലെവൽ ഓഫിസർമാർ സന്ദർശിക്കും. ഉദ്യോഗസ്ഥർ വോട്ടറുടെ രേഖകൾ ശേഖരിച്ച് ECINETൽ അപ്ലോഡ് ചെയ്യും. തുടർന്ന് വോട്ടറുടെ യോഗ്യതയെക്കുറിച്ച് ഇലക്ടറൽ രജിസ്ട്രേഷൻ ഓഫിസർ തീരുമാനമെടുക്കും.
ചില പ്രത്യേക സാഹചര്യങ്ങളിൽ അല്ലാതെ വോട്ടർമാരെ ഓഫിസിലേക്ക് ഹിയറിങ്ങിനായി വിളിപ്പിക്കില്ല. ഇലക്ടറൽ രജിസ്ട്രേഷൻ ഓഫിസർ തീരുമാനിക്കുന്ന അപൂർവ കേസുകളിൽ (കഴിയുന്നതും ഓൺലൈനായി) ഹിയറിങ് നടത്തും. ആവശ്യമെങ്കിൽ വോട്ടർക്ക് പകരം കുടുംബത്തിലെ ഏതെങ്കിലും മുതിർന്ന അംഗത്തെ ഹിയറിങ്ങിൽ പങ്കെടുക്കാൻ ചുമതലപ്പെടുത്താം. ഓൺലൈൻ ഹിയറിങ് സൗകര്യങ്ങൾ വിപൂലീകരിക്കുമെന്നും കമീഷൻ അറിയിച്ചു. നൈറ്റ് ഷെൽട്ടറുകളിൽ കഴിയുന്നവർ, തൊഴിലാളികൾ, ദരിദ്രർ, ഭവനരഹിതർ തുടങ്ങിയവർക്കായി ജില്ലാ തെരഞ്ഞെടുപ്പ് ഓഫിസർമാർ ആവശ്യത്തിന് ഹെൽപ്പ് ഡെസ്ക്കുകൾ സ്ഥാപിക്കുകയോ പ്രത്യേക ക്യാമ്പുകൾ നടത്തുകയോ ചെയ്യണം.
എസ്.ഐ.ആറിന് ഒപ്പമുള്ള ഫോം ആറിൽ മാറ്റമുണ്ടാകില്ല. എസ്.ഐ.ആർ ഇല്ലാത്ത കാലയളവിൽ, പഴയ ഫോമുകൾ (1960 ലെ ഇലക്ടറൽ രജിസ്ട്രേഷൻ ചട്ടങ്ങൾ) ഉപയോഗിക്കുമെന്നും കമീഷൻ വ്യക്തമാക്കി.
എസ്.ഐ.ആറിൽ വെട്ടിമാറ്റിയവരെ ചേർക്കാം -കമീഷൻ
ന്യൂഡൽഹി: എസ്.ഐ.ആർ ഇതിനകം നടപ്പാക്കിയ 20 സംസ്ഥാനങ്ങളിലും കേന്ദ്ര ഭരണപ്രദേശങ്ങളിലും എസ്.ഐ.ആറിൽ പുറത്തായവർക്കും പുതിയ വോട്ടർമാർക്കും ഓരോ മണ്ഡലത്തിലെയും ഇ.ആർ.ഒമാർ വഴി പേരുചേർക്കാമെന്ന് കേന്ദ്ര തെരഞ്ഞെടുപ്പ് കമീഷൻ വാർത്താകുറിപ്പിലും ആവർത്തിച്ചു. എസ്.ഐ.ആറിലൂടെ കോടിക്കണക്കിന് പേരെ വെട്ടിമാറ്റിയെന്ന് പറയുമ്പോഴെല്ലാം കമീഷൻ നൽകുന്ന മറുപടിയാണിത്.
അതേ സമയം പശ്ചിമ ബംഗാളിൽ ഇതിനകം വെട്ടിമാറ്റിയ ലക്ഷക്കണക്കിന് വോട്ടർമാർ ട്രൈബ്യൂണലുകൾക്കുമുന്നിൽ അപേക്ഷകളുമായി കാത്തുനിൽക്കുകയാണ്. ഡൽഹി എസ്.ഐ.ആറിലുയർന്ന പരാതികൾക്കിടെ ഡൽഹിയിലും മഹാരാഷ്ട്രയിലും വോട്ടുചേർക്കാൻ കമീഷൻ സമയം നീട്ടി നൽകി.
2026 ജൂലൈ മുതൽ എന്നാൽ 18 വയസ്സ് പൂർത്തിയായ യുവ വോട്ടർമാർക്ക് ഫോം 6 ഉപയോഗിച്ച് വോട്ടർ പട്ടികയിൽ പേര് ചേർക്കാൻ കഴിയാത്ത സാഹചര്യത്തെക്കുറിച്ച് കമീഷൻ പ്രതികരിച്ചിട്ടില്ല. ഇരു കമീഷണർമാർക്കും തന്നെ കുറിച്ചുള്ള പരാതികൾ കൂടി പരിഹരിക്കുമെന്ന് തോന്നിക്കുന്ന തരത്തിൽ കമീഷന്റെ എല്ലാ യോഗങ്ങൾക്കും മുന്നോടിയായി അജണ്ട വിതരണം ചെയ്യുമെന്നും മിനുട്സുകൾ കൈമാറുമെന്നും വാർത്താക്കുറിപ്പിലുണ്ട്. ഇരു കമീഷണർമാരും കേന്ദ്ര കാബിനറ്റ് സെക്രട്ടറിക്കയച്ച കത്ത് കമീഷന്റെയോ ഐ.ടി ഡിവിഷന്റെയോ നയപരമായ കാര്യങ്ങളെ കുറിച്ചായിരുന്നില്ലെന്നും മറിച്ച് ഉദ്യോഗസ്ഥരുടെ ചുമതലകളെ കുറിച്ചായിരുന്നുവെന്നും കമീഷൻ ന്യായീകരിച്ചു.
ഇ.സി.ഐ നെറ്റ് വിലയിരുത്താൻ സമിതി
ഇ.സി.ഐ നെറ്റ് എന്ന സോഫ്റ്റ്വെയർ ഉപയോഗിച്ച് എല്ലാ സംസ്ഥാനങ്ങളിലെയും വോട്ടർ പട്ടികകൾ ഗ്യാനേഷ് കുമാറിന്റെയും ഐ.ടി ഡയറക്ടർ ജനറൽ സീമ ഖന്നയുടെയും നേരിട്ടുള്ള നിയന്ത്രണത്തിലാക്കിയത് വിവാദമായ സാഹചര്യത്തിൽ നിയമവും ചട്ടവുമനുസരിച്ചാണോ ഇ.സി.ഐ നെറ്റ് പ്രവർത്തിപ്പിക്കുന്നതെന്ന് മുതിർന്ന ഡെപ്യൂട്ടി തെരഞ്ഞെടുപ്പ് കമീഷണർ അധ്യക്ഷനായ സമിതി വിലയിരുത്തും.
ആ സമിതിയിൽ ഒരു സ്വതന്ത്ര ഐ.ഐ.ടി വിദഗ്ധനെ അംഗമാക്കാനും മൂന്ന് കമീഷണർമാരുടെ യോഗം തീരുമാനിച്ചു. ചട്ടങ്ങൾക്ക് അനുസൃതമായാണോ ഇ.സി.ഐ നെറ്റ് നിലവിൽ പ്രവർത്തിക്കുന്നതെന്ന് പരിശോധിക്കുമെന്നാണ് ഇവർ പറയുന്നത്. അതേസമയം ഇ.ആർ.ഒ അടക്കമുള്ള ഫീൽഡ് ഓഫിസർമാർക്ക് അവരുടെ നിയമപരമായ പദവി പ്രകാരം സോഫ്റ്റ്വെയർ ഉപയോഗിക്കാനുള്ള അനുമതി നൽകിയിട്ടുണ്ടെന്ന് കമീഷൻ അവകാശപ്പെട്ടു. ഇ.സി.ഐനെറ്റ് ഡൽഹിയുടെ നിയന്ത്രണത്തിലാക്കിയതോടെ ഗോവയിൽ നിന്നടക്കം ഇ.ആർ.ഒമാർക്ക് വോട്ടു ചേർക്കാൻ കഴിയാത്ത സ്ഥിതിവിശേഷം റിപ്പോർട്ട് ചെയ്യപ്പെട്ട സാഹചര്യത്തിലാണ് കമീഷന്റെ ഈ അവകാശവാദം.
ഗോവയിൽ എസ്.ഐ.ആറിൽ വോട്ടുവെട്ടിയ 97 പേരിൽ 81 പേരുടെ അപേക്ഷ പൂരിപ്പിച്ച് ഇ.ആർ.ഒമാർ അവരെ ചേർക്കാൻ ശ്രമിച്ചിട്ടും ഇ.സി.ഐ നെറ്റ് തുറന്നുകിട്ടാത്തത് പുറത്തുവന്നപ്പോൾ അവരെ പിന്നീട് ചേർത്തുവെന്ന് പറഞ്ഞൊഴിയുകയാണ് കമീഷൻ ചെയ്തത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.