അബൂദബി യൂനിവേഴ്സിറ്റിയിൽ നടന്ന ചടങ്ങിൽ ഇന്ത്യൻ അംബാസഡർ സഞ്ജയ് സുധീർ
വിദ്യാർഥിക്ക് അനുമോദന പത്രം സമ്മാനിക്കുന്നു
അബൂദബി: പ്രവാസി വിദ്യാർഥികളുടെ വിദ്യാഭ്യാസമികവിന് മീഡിയവൺ ഏർപ്പെടുത്തിയ ‘മബ്റൂക് ഗൾഫ് ടോപ്പേഴ്സിന്റെ’ ആദ്യഘട്ട പുരസ്കാരങ്ങൾ അബൂദബിയിൽ വിതരണം ചെയ്തു. പത്താം ക്ലാസിലും പ്ലസ് ടുവിലും ഉന്നതവിജയം നേടിയ അബൂദബി, അൽഐൻ എന്നിവിടങ്ങളിലെ വിദ്യാർഥികളെയാണ് അബൂദബി യൂനിവേഴ്സിറ്റി ഹാളിൽ ആദരിച്ചത്. ഇന്ത്യൻ അംബാസഡർ സഞ്ജയ് സുധീർ പുരസ്കാര വിതരണത്തിന്റെ ഉദ്ഘാടനം നിർവഹിച്ചു. വിജ്ഞാനരംഗത്തെ ഓരോ ഇന്ത്യക്കാരന്റെയും മുന്നേറ്റം അഭിമാനകരമാണെന്നും ഓരോ മേഖലയിലെയും മികവ് രാജ്യം എന്നനിലയിൽ ഇന്ത്യക്ക് മുതൽക്കൂട്ടാണെന്നും അംബാസഡർ പറഞ്ഞു.
അബൂദബിയിലെയും അൽഐനിലെയും സ്കൂളുകളിൽനിന്ന് 90 ശതമാനത്തിലേറെ മാർക്ക് കരസ്ഥമാക്കിയ 282 വിദ്യാർഥികൾക്കാണ് മബ്റൂക് ഗൾഫ് ടോപ്പേഴ്സ് പുരസ്കാരം സമ്മാനിച്ചത്.
അബൂദബി യൂനിവേഴ്സിറ്റി ചാൻസലർ ഡോ. ഗസ്സാൻ അവ്വാദ്, സി.ബി.എസ്.ഇ ജി.സി.സി ചാപ്റ്റർ പ്രസിഡന്റ് ഡോ. താക്കൂർ എസ്. മുൽചന്ദാനി, അബൂദബി ഇന്ത്യൻ സോഷ്യൽ ആൻഡ് കൾചറൾ സെന്റർ വൈസ് പ്രസിഡന്റ് റെജി സി. ഉലഹന്നാൻ, ലുലു ഗ്രൂപ് മാധ്യമവിഭാഗം സെക്രട്ടറി ബിജു കൊട്ടാരത്തിൽ, മീഡിയവൺ-ഗൾഫ് മാധ്യമം ജി.സി.സി ഡയറക്ടർ സലീം അമ്പലൻ, എക്സിക്യൂട്ടിവ് കമ്മിറ്റി അംഗം മുഹമ്മദ് കൊലപ്പറമ്പൻ, മീഡിയവൺ ജി.സി.സി എഡിറ്റോറിയൽ വിഭാഗം മേധാവി എം.സി.എ. നാസർ, മീഡിയ സൊലൂഷൻസ് സീനിയർ മാനേജർ ഷഫ്നാസ് അനസ് എന്നിവർ വിദ്യാർഥികൾക്ക് മെഡലും സർട്ടിഫിക്കറ്റും സമ്മാനിച്ചു. പരിപാടിയുടെ ഗോൾഡൻ വിസ പാർട്ണറായ ഇ.സി.എച്ച് ഡിജിറ്റൽ മേധാവി ഇക്ബാർ മാർക്കോണിയും ചടങ്ങിൽ സംസാരിച്ചു.
സെപ്റ്റംബർ 17ന് ദുബൈയിൽ ഡീ മോന്റ്ഫോർഡ് യൂനിവേഴ്സിറ്റിയിലും 29ന് അജ്മാൻ ഹാബിറ്റാറ്റ് സ്കൂളിലുമാണ് മീഡിയവൺ മബ്റൂഖ് ഗൾഫ് ടോപ്പേഴ്സിന്റെ അടുത്ത പരിപാടികൾ നടക്കുക.
ഹാബിറ്റാറ്റ് സ്കൂൾസ്, അറക്കൽ ഗോൾഡ് ആൻഡ് ഡയമണ്ട്സ്, ഇ.സി.എച്ച് ഡിജിറ്റൽ എന്നിവയുടെ സഹകരണത്തോടെയാണ് മീഡിയവൺ മബ്റൂഖ് ഗൾഫ് ടോപ്പേഴ്സ് ഒരുക്കുന്നത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.