സ്ഥാപകദിനം ആഘോഷിച്ച് സൗദി അറേബ്യ

റിയാദ്​: രാജ്യമെങ്ങും സ്ഥാപകദിനം ആഘോഷിച്ച്​ സൗദി അറേബ്യ. 1727 ഫെബ്രുവരി 22ന് ഇമാം മുഹമ്മദ് ബിൻ സഊദി​ന്റെ കൈകളാൽ ആദ്യ സൗദി രാഷ്​ട്രം സ്ഥാപിക്കപ്പെട്ടതി​ന്റെ വാർഷികദിനത്തിൽ വിപുലമായ ആഘോഷ പരിപാടികൾക്കാണ്​ രാജ്യം സാക്ഷ്യംവഹിച്ചത്​.

സൗദി ഭരണകൂടത്തി​ന്റെ ഉറച്ച വേരുകളിലും ആധികാരിക മൂല്യങ്ങളിലും ചരിത്രപരമായ ആഴത്തിലും ഉറച്ച നിലപാടിലും രാജ്യനിവാസികൾ ഒന്നടങ്കം ഒരിക്കൽകൂടി അഭിമാനം പ്രകടിപ്പിച്ചു. മൂന്നു നൂറ്റാണ്ടുകൾക്കുമുമ്പ് ദറഇയ തലസ്ഥാനമാക്കി ആദ്യത്തെ സൗദി രാഷ്​ട്രം സ്ഥാപിതമായത് മുതൽ അതിലെ പൗരന്മാരും ഭരണാധികാരികളും തമ്മിലുള്ള അടുത്ത ബന്ധങ്ങൾ അവർ അനുസ്​മരിച്ചു.

പിന്നിട്ട ഭരണാധികാരികളുടെ കാലത്ത്​ സൗദിയിലുണ്ടായ വികസനവും വളർച്ചയും ആഗോളതലത്തിൽ നേടിയ കീർത്തിയും അവർ അയവിറക്കി. മൂന്ന് നൂറ്റാണ്ടുകൾ കൊണ്ടുനടന്ന, ചരിത്രത്തിൽ അനശ്വരമാക്കപ്പെട്ട, അറേബ്യൻ ഉപദ്വീപിലും ലോകമെമ്പാടും അതി​ന്റെ നാഴികക്കല്ലുകൾ ദൃശ്യമാകുകയും ചെയ്ത സംഭവങ്ങളും സാഹചര്യങ്ങളും ഓർമിക്കാനുള്ള അവസരമാക്കി. തങ്ങളുടെ മനസ്സാക്ഷിയിലെ പ്രിയപ്പെട്ട ഓർമദിനമായി അവർ സ്ഥാപകദിനം ആഘോഷിച്ചു.

സാമൂഹികവും രാഷ്​ട്രീയവും സാമ്പത്തികവും സാംസ്കാരികവുമായ സംഭവങ്ങളുടെ സമ്പന്നമായ റെക്കോഡ് നേട്ടം ​​​കൈവരിച്ച്​ പുരോഗതിയുടെ പാതയിൽ മുന്നേറികൊണ്ടിരിക്കുന്ന സൗദിയിൽ ഇമാം മുഹമ്മദ് ബിൻ സഊദ് സ്ഥാപിച്ച മഹത്തായ ചരിത്ര പൈതൃകത്തി​ന്റെ സ്​മരണ പുതുക്കിയ വൈവിധ്യമാർന്ന പരിപാടികളാണ്​ രാജ്യമെങ്ങും അരങ്ങേറിയത്​. മൂന്നു നൂറ്റാണ്ടുകൾക്ക് മുമ്പുള്ള ഓർമകളും ചരിത്രത്തിലെ അനശ്വരമായ സംഭവങ്ങളും സാഹചര്യങ്ങളും ഓർമിപ്പിക്കുന്ന വിവിധ പരിപാടികൾക്ക് രാജ്യത്തെ വിവിധ​ നഗരങ്ങൾ വേദിയായി.

സംസ്‌കാരവും പൈതൃകവും പ്രതിഫലിപ്പിക്കുന്ന തോരണങ്ങളാലും പോസ്റ്ററുകളാലും പതാകകളാലും കെട്ടിടങ്ങളെല്ലാം അലങ്കരിക്കപ്പെട്ടു. സമൃദ്ധിയിലൂടെയും പ്രയാസങ്ങളിലൂടെയും രാജ്യം കടന്നുപോയ കാലത്തി​ന്റെ അധ്യായങ്ങൾ തുറപ്പിക്കുന്ന ചിത്രങ്ങളുടെ പ്രദർശനങ്ങൾ നടന്നു. കവിയരങ്ങും പരമ്പരാഗത കലാപ്രകടനങ്ങളും മാരത്തണും (കൂട്ടയോട്ട പരിപാടികളും) അരങ്ങേറി. മ്യൂസിയങ്ങളിൽ പ്രത്യേക പരിപാടികൾ സംഘടിപ്പിച്ചു.

രാജ്യത്തി​ന്റെ പുരാതന പൈതൃകവുമായുള്ള ബന്ധത്തെ പ്രതിഫലിപ്പിക്കുന്ന വസ്​ത്രങ്ങളണിഞ്ഞ്​ സ്​ത്രീകളും കുട്ടികളുമടക്കമുള്ളവർ തങ്ങളുടെ രാജ്യത്തോടും ഭരണാധികാരികളോടുമുള്ള സ്​നേഹവും ബന്ധവും ഊട്ടിയുറപ്പിച്ചു. 2025ലെ സൗദി കപ്പ്​ ആറാം പതിപ്പിൽ കുതിരപ്പന്തയത്തിൽ പരമ്പരാഗത വേഷവിധാനങ്ങളിൽ ആളുകൾ പങ്കെടുക്കാനെത്തിയത്​ ശ്രദ്ധേയമായി. ആധികാരികതയും ചരിത്രവും പ്രകടിപ്പിക്കുന്ന വസ്​ത്രത്തിൽ അവർ തിളങ്ങി. വെടിക്കെട്ടും ഘോഷയാത്രകളും ആഘോഷത്തി​ന്റെ പൊലിമ കൂട്ടി.