രണ്ടു തരം വായനകൾ - കവിത

ഒന്ന്:

കാറ്റിനും വെളിച്ചത്തിനും

മൂഡിനുമനുസരിച്ച്

ചാരുകസേരയിലും

നിവർന്നിരുന്നുമുള്ളത്..

ആഴവും ഗൗരവവുമുള്ളത് എന്ന്

തോന്നിക്കുന്നത്..

രണ്ട് :

ദോശയ്ക്കും

കറികൾക്കുമൊപ്പം

നിന്നു വായിച്ചു തീർക്കുന്നത്..

രാത്രി ഉറക്കമൊഴിഞ്ഞും

തീർക്കുന്നത്..

ലൈബ്രറിയിൽ

പകുതിനിർത്തിപ്പോരുന്നത്..

മുറിഞ്ഞു മുറിഞ്ഞ വായനകൾ..

പുസ്തകം വായിക്കുന്നുള്ളോൾ

എന്നതിന് നിത്യജീവിതത്തിൽ

സമരം ചെയ്യുന്നവൾ

എന്നും കൂടി അർത്ഥം..

പുസ്തകം വായിക്കുന്നോളെന്നത്

ആക്ഷേപം പോലെ

ചൂണ്ടിനിൽക്കുന്നത് -

മനോരാജ്യം കാണുന്നവൾ,

സമയംകളയുന്നവൾ,

മടിച്ചി, കൂസലില്ലാത്തവൾ,

പരിഷ്കാരിണി...

വായന

പെണ്ണുങ്ങൾക്ക്

ഒരെളുപ്പപ്പണിയല്ല..

ഒരു കാലത്തും അല്ല..