കൈക്കോട്ട്

വെറുമൊരായുധം മാത്രമല്ല കൈക്കോട്ട്

മണ്ണിലും മനസ്സുകളിലുമാണ്ടു പോയ

വരണ്ട ചിന്തകളെയുണർത്തുന്ന

മാറ്റത്തിൻ്റെ ശബ്ദമാണ്

തടിയുമിരുമ്പുമൊന്നാകുന്ന

പ്രത്യാശകളുടെ മുഷ്ടികയാണ്

വിയർപ്പിൽ നിന്നുയരുന്ന കരുത്താണതിന്

ഈർഷ്യയിരുൾ മൂടിയ പാതകളെയത്

ചെത്തി മിനുക്കുന്നു

വിദ്വേഷങ്ങളെ വേരറ്റു വീഴ്ത്തി

പകയാർത്തു വളരുന്ന പാടങ്ങളിൽ

പ്രേമത്തിൻ വിത്തുകൾ വിതക്കുന്നു

ഓർമ്മകളെ കൊയ്തെടുക്കുന്നു

തളർച്ചകളുടെ വെയിലിൽ തളർന്നാലും

തളിർക്കുവാനിടമുണ്ടെന്ന നിശബ്ദ

സത്യത്തെ പുറത്തെടുക്കുന്നു

സ്പർദ്ധ മേയും മേടുകളിൽ കൈക്കോട്ടൊരു

പ്രതിജ്ഞയാണ്

നീയും ഞാനുമെന്ന ഭിന്നതയകറ്റി

നാമെന്നൊരൊറ്റവാക്കിൽ

മനുഷ്യരാകാനുള്ള പ്രതിജ്ഞ

വെറുമൊരു പണിയായുധമല്ല കൈക്കോട്ട്

നിർമാർജ്ജനം മാത്രമല്ല മനുഷ്യ

മനസ്സുകളുടെ ശുദ്ധീകരണവും ദൗത്യമാണ്.