യു.പി.എ സർക്കാറി​െൻറ ഭരണകാലത്തെ വളർച്ച നിരക്ക്​ ക​ുറച്ചു

ന്യൂഡൽഹി: 2019ൽ പൊതുതെരഞ്ഞെടുപ്പ്​ നടക്കാനിരിക്കെ കോൺഗ്രസിനെ​ പ്രതിരോധത്തിലാക്കാൻ യു.പി.എ സർക്കാറി​​െൻറ ഭരണകാലത്തെ വളർച്ച നിരക്കിൽ മാറ്റം വരുത്തി. മാനദണ്ഡത്തിൽ മാറ്റം വരുത്തിയാണ്​ വളർച്ച നിരക്ക്​ പുനക്രമീകരിച്ചത്​. 2010-11 സാമ്പത്തിക വർഷത്തിൽ 10.3 ശതമാനമായിരുന്നു രേഖപ്പെടുത്തിയ വളർച്ച നിരക്ക്​. ഉദാരീകരണത്തിന്​ ശേഷം രാജ്യം ഏറ്റവും കൂടുതൽ വളർച്ച നിരക്ക്​ രേഖപ്പെടു​ത്തിയത്​ ഇൗ സാമ്പത്തിക വർഷമായിരുന്നു​.

8.3 ശതമാനമായാണ്​​ വളർച്ച നിരക്ക്​ കുറച്ചത്​. പുതിയ വിവരങ്ങൾ പ്രകാരം കണക്കാക്കിയപ്പോഴാണ്​ വളർച്ച നിരക്ക്​ കുറഞ്ഞതെന്ന്​ നീതി ആയോഗ്​ വൈസ്​ ചെയർമാൻ രാജീവ്​ കുമാർ പറഞ്ഞു. വളർച്ച നിരക്ക്​ കണക്കാക്കുന്ന രീതിയിലും മാറ്റം വരുത്തിയിട്ടുണ്ടെന്നും അദ്ദേഹം വ്യക്​തമാക്കി. ഖനനം, ക്വാറിയിങ്​, ടെലികോം തുടങ്ങിയ മേഖലകളിലെ കണക്കുകളിൽ പുന:പരിശോധന നടത്തിയപ്പോൾ വ്യത്യാസം കണ്ടെത്തിയതെന്നും അദ്ദേഹം കൂട്ടിച്ചേർത്തു.

2005-06 സാമ്പത്തിക വർഷത്തിലെ വളർച്ച നിരക്ക്​ 9.3 ശതമാനത്തിൽ നിന്ന്​ 7.9 ശതമാനമായി കുറച്ചിട്ടുണ്ട്​. 2006-07 സാമ്പത്തിക വർഷത്തിലെ വളർച്ച നിരക്ക്​ 8.1 ശതമാനമായും 2007-08ലേത്​ 7.7 ശതമാനമായാണ്​ കുറച്ചിരിക്കുന്നത്​.