സഞ്ജു സാംസൺ
മുംബൈ: കഴിഞ്ഞ ദിവസം ഫിറ്റ്നസ് ടെസ്റ്റിന്‍റെ ഭാഗമായി നടന്ന രണ്ടുകിലോമീറ്റർ ഓട്ടത്തിൽ പരാജയപ്പെട്ടെങ്കിലും രണ്ടാം അവസരത്തിൽ യോ-യോ ടെസ്റ്റ് പാസായി മലയാളി താരം സഞ്ജു സാംസൺ. ഫിറ്റ്നെസ് ടെസ്റ്റ് വിജയിച്ചതായും വിജയ് ഹസാരെ ട്രോഫിക്കായി ഒരുങ്ങുകയാണെന്നും സഞ്ജു സാമൂഹിക മാധ്യമങ്ങളിലൂടെ അറിയിക്കുകയായിരുന്നു.
ടീം ഫിറ്റ്നെസ് ഉറപ്പാക്കാനായി ഇന്ത്യൻ ക്രിക്കറ്റ് കൺട്രോൾ ബോർഡ് ഏർപെടുത്തിയ രണ്ടു കിലോമീറ്റർ ഓട്ടത്തിൽ സജ്ഞു സാംസൺ ഉൾപെടെ ആറു പേർ പരാജയപ്പെട്ടിരുന്നു. ഇഷാൻ കിഷൻ, നിതീഷ് റാണ, രാഹുൽ തെവാത്തിയ, സിദ്ധാർഥ് കൗൾ, ജയദേവ് ഉനദ്കട്ട് എന്നിവരാണ് ബംഗളൂരുവിലെ നാഷനൽ ക്രിക്കറ്റ് അക്കാദമിയിൽ ആരംഭിച്ച ഫിറ്റ്നസ് റൺ' പരാജയപ്പെട്ടത്.
പുതുതായി ഉൾപെടുത്തിയതായതിനാൽ എല്ലാവർക്കും ഫിറ്റ്നെസ് ഉറപ്പാക്കാൻ രണ്ടാമതും അവസരം നൽകുകയായിരുന്നു. ഇംഗ്ലണ്ടിനെതിരായ ഏകദിനങ്ങൾ, ട്വൻറി20 പരമ്പരയിൽ ഇടം നേടാൻ ടെസ്റ്റിൽ വിജയിക്കുക പ്രധാനമാണ്.
2018ൽ സാംസൺ, മുഹമ്മദ് ഷമി, അംബാട്ടി റായുഡു എന്നിവർ സമാനമായി യോ-യോ ടെസ്റ്റ് പരാജയപ്പെട്ടിരുന്നു. ഇതോടെ ഇംഗ്ലണ്ട് പര്യടനത്തിലെ ഏകദിനങ്ങളിൽനിന്നുൾപെടെ ഇവർ പുറത്തായി.
അടുത്തിടെ ആസ്ട്രേലിയക്കെതിരെ നടന്ന ട്വൻറി20 പരമ്പരയിൽ സാംസൺ അംഗമായിരുന്നു. 20ലധികം താരങ്ങൾക്കാണ് യോ-യോ ടെസ്റ്റും രണ്ടു കിലോമീറ്റർ ഓട്ടവും നടത്തി ഫിറ്റ്നസ് പരിശോധിക്കുന്നത്. ഈ വർഷം നടക്കുന്ന ട്വൻറി20 ലോകകപ്പിലുൾപെടെ ഇറങ്ങാനുള്ള ടീമിനെ കണ്ടെത്താൻ ലക്ഷ്യമിട്ടാണ് പരിശോധന.
ബാറ്റ്സ്മാൻ, വിക്കറ്റ്കീപർ, സ്പിന്നർ എന്നിവർ എട്ടുമിനിറ്റും 30 സെക്കൻഡുമെടുത്ത് രണ്ടു കിലോമീറ്റർ ദൂരം പൂർത്തിയാക്കണമെന്നാണ് ചട്ടം. ഫാസ്റ്റ്ബൗളർക്ക് സമയപരിധി പിന്നെയും ചുരുങ്ങി എട്ടുമിനിറ്റ് 15 സെക്കൻഡാകും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.