തിരുവനന്തപുരം: സംസ്ഥാനത്തെ സ്പോര്ട്സ് സ്കൂളുകൾക്ക് പ്രത്യേക പാഠ്യപദ്ധതി വികസിപ്പിക്കാന് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന ഉന്നതതല യോഗം തീരുമാനിച്ചു. പാഠ്യപദ്ധതി വികസിപ്പിക്കുന്ന ചുമതല എസ്.സി.ഇ.ആര്.ടിക്ക് നല്കും.
ചോദ്യപേപ്പര് നിര്മാണവും അച്ചടിയും, പരീക്ഷ നടത്തിപ്പ്, മൂല്യനിര്ണയം, ഫലപ്രഖ്യാപനം, സര്ട്ടിഫിക്കറ്റ് വിതരണം എന്നിവ സമയബന്ധിതമായി നടപ്പാക്കുന്നതിന് പരീക്ഷ ഭവനെ ചുമലപ്പെടുത്തും. സ്പോര്ട്സ് സ്കൂളുകളുടെ പ്രവര്ത്തനം കാര്യക്ഷമമാക്കാന് പ്രിന്സിപ്പല് തസ്തിക സൃഷ്ടിച്ച് ഒരു മാസത്തിനുള്ളില് നിയമനം നടത്തും.
സ്പോര്ട്സ് റെസിഡന്ഷ്യല് സ്കൂള് സംവിധാനത്തില് പ്രവര്ത്തിക്കാന് താല്പര്യവും അഭിരുചിയുമുള്ള അധ്യാപകരെ കണ്ടെത്തി ഒരു മാസത്തിനകം സ്പോര്ട്സ് സ്കൂളുകളില് പുനര്വിന്യസിക്കും. സ്പോര്ട്സ് സ്കൂളിലെ ഹൈസ്കൂള് വിഭാഗത്തില് ഒരു ഹെഡ് ക്ലര്ക്ക്, നാല് ക്ലര്ക്ക് , ഒരു റെക്കോഡ് അറ്റന്ഡര്, മൂന്ന് ഓഫിസ് അറ്റൻഡന്റ് എന്നിവരെ കായിക വകുപ്പില്നിന്ന് പുനര്വിന്യാസം നടത്തി രണ്ട് ആഴ്ചക്കകം നിയമിക്കും.
സ്പോര്ട്സ് സ്കൂളിലും ഹോസ്റ്റലുകളിലും അനുവദനീയമായ എണ്ണം കുട്ടികളെ പ്രവേശിപ്പിക്കും. ആവശ്യമായ സൗകര്യങ്ങള് ഒരുക്കി അടുത്ത അഞ്ചുവര്ഷത്തിനുള്ളില് കൂടുതല് കുട്ടികള്ക്ക് പ്രവേശനം നല്കാവുന്ന സ്ഥിതി സൃഷ്ടിക്കും.
സ്പോര്ട്സ് ഹോസ്റ്റലുകള് നടത്തുന്ന സ്ഥാപനങ്ങളില് ആവശ്യമായ കുട്ടികളെ ശാസ്ത്രീയ മാനദണ്ഡങ്ങളുടെ അടിസ്ഥാനത്തില് റിക്രൂട്ട് ചെയ്യും. യോഗത്തില് മന്ത്രിമാരായ വി. ശിവന്കുട്ടി, വി. അബ്ദുറഹ്മാൻ എന്നിവരും ഉദ്യോഗസ്ഥരും പങ്കെടുത്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.