അയിലൂരിൽ കാട്ടുപന്നി ശല്യം; ഒന്നര ഏക്കർ നെൽകൃഷി നശിപ്പിച്ചു

നശിപ്പിച്ചത്​ 25 ദിവസം കഴിഞ്ഞാൽ കൊയ്തെടുക്കാൻ പാകമായ വിള നെന്മാറ: അയിലൂർ ചേവിണി പാടശേഖരത്തിലെ വിളഞ്ഞ നെൽകൃഷി കാട്ടുപന്നിക്കൂട്ടം നശിപ്പിച്ചു. ചെവിണിക്കളം മുത്തുക്കുട്ടി, ഇബ്രാഹിം, ഇസ്ഹാഖ്​ തുടങ്ങിയ കർഷകരുടെ വിളകളാണ് വ്യാപകമായി നശിപ്പിച്ചത്. പാടശേഖരത്തിലെ വിവിധ ഭാഗങ്ങളിലെ ഒന്നര ഏക്കർ സ്ഥലത്തെ നെൽചെടികളാണ് ഉപയോഗശൂന്യമായത്​. 25 ദിവസം കഴിഞ്ഞാൽ കൊയ്തെടുക്കാൻ പാകമായ വിളയായിരുന്നെന്ന്​ കർഷകർ പറഞ്ഞു. രണ്ടുദിവസം മുമ്പും കൃഷി നശിപ്പിച്ചിരുന്നു. തുടർന്ന് രാത്രി കർഷകർ കാവൽ നിന്നെങ്കിലും ഫലമുണ്ടായില്ല. വിള നശിപ്പിക്കുന്ന കാട്ടുപന്നികളെ കൊല്ലാൻ സർക്കാർ ഉത്തരവുണ്ടെങ്കിലും അയിലൂർ പഞ്ചായത്തിൽ വനംവകുപ്പ് ഇത് നടപ്പാക്കിയിട്ടില്ല. കർഷകർ നെല്ലിയാമ്പതി വനം റേഞ്ച് ഓഫിസിൽ കൃഷിനാശം അറിയിച്ചിട്ടുണ്ട്.